Jańa kólikterdi budan bylaı onlaın tirkeýge bolady
NUR-SULTAN. QazAqparat - Elektrondy úkimet portalynda dılerden satyp alǵan kólikti bastapqy deńgeıde tirkeýge múmkindik beretin qyzmet paıda boldy, dep habarlaıdy QazAqparat tilshisi Koleso.kz saıtyna silteme jasap.
Aqparat kóziniń habarlaýynsha, avtokólikterdi onlaın tirkeý qyzmeti Qazaqstanda óndirilgen kólikter úshin de, el aýmaǵyna ımporttalǵandary úshin de qoljetimdi. Ony qoldaný úshin dılerlik ortalyq egov.kz portalynda kólik quralyn tirkeýge ótinim berýi tıis.
«Ol úshin portalda avtorlandyrýdan ótip, «Kólik jáne kommýnıkatsııalar» bóliminen «Qazaqstan Respýblıkasy aýmaǵyndaǵy resmı dılerlerden satyp alynǵan kólik quraldaryn bastapqy tirkeý» degen aıdarǵa ótip, «Onlaın suraý» batyrmasyn basý qajet. Artynsha «Shanaq nómirin» engizesiz. «Shanaq nómiri» sátti tekserilgen soń ótinimdegi barlyq mindetti joldardy toltyrý kerek. Osydan keıin qajetti qujattardy tirkeısiz de, suranymda kólikti satyp alýshynyń JSN-in engizý qajet. ETsQ (elektrondy tsıfrlyq qoltańba) arqyly qol qoıasyz. Sodan soń satyp alýshyǵa rastaýǵa jiberý kerek», - delingen habarlamada.
Ári qaraı satyp alýshy «Qyzmetterdi alý tarıhy» bólimine ótip, jeke kabınetindegi rásimdelgen suranymmen tanysýy tıis. Artynsha kóligine nómir tańdap, memlekettik baj salyǵy men tirkeý jarnasyn tóleıdi de, ETsQ arqyly suranymdy rastaıdy.
Satyp alýshy daıyn qujattardy ózi turatyn óńirdegi mamandandyrylǵan HQKO-nan alyp kete alady.
