Jańa kólikke eń kóp minetinder - Astana men Almaty turǵyndary
ASTANA. QazAqparat - Qańtar-qazan aralyǵynda Qazaqstanda resmı dılerler 36 961 avtomobıl satty. Bul 2016 jyldyń osy kezeńimen salystyrǵanda 5,3%-ǵa joǵary, dep habarlady «QazAvtoProm» baspasóz qyzmetinen.
2017 jyldyń on aıynda qazaqstandyqtar jeńil kólikterge 893,1 mln dollar jumsaǵan, bul 2016 jyldyń osy kezeńimen salystyrǵanda, 33,7%-ǵa kóp. Eń kóp kólik satyp alǵandar Astana men Almaty qalalarynyń turǵyndary.
Atalmysh kezeńde temir tulpar satyp alýda Almaty (9320 avtokólik satyp alyndy), Astana (6 873), Shymkent (2 536), Atyraý (2509), Qostanaı (2298), Qaraǵandy (2066), Oral (1874), Óskemen (1 829), Aqtaý (1 429) jáne Aqtóbe (1 382) qalalarynyń turǵyndary belsendilik tanytqan.
Qazan aıynyń qorytyndysy boıynsha, qundyq shamadaǵy naryq kólemi 107,7 mln dollarǵa jetip, bir jyl burynǵy kórsetkishten 18,2 paıyzǵa asyp tústi.
Qazaqstandyqtardyń suranysyna ıe bolǵan brendter reıtıngisinde Toyota kósh bastap tur (7619 avtokólik satyldy). Lada markaly kólikterdiń satylymy 6774 danany qurady. Úshinshi oryndaǵy Ravon mashınalaryn 3 393 qazaqstandyq tizgindegen.
