Jańa kólik quraldary tapsyryldy
ASTANA. 7 qazan. QazAqparat - 2013 jyldyń 7 qazanynda 2177 áskerı bóliminiń bazasynda jap-jańa kólik quraldarynyń kiltteri saltanatty jaǵdaıda ıelerine tapsyryldy. Bul týraly QR UQK ShQ baspasóz qyzmeti habarlaıdy.
Bul joly shekara kúzetetin bólimshelerge 200-deı kólik, onyń ishinde «ÝAZ» markaly jeńil, júk jáne jolaýshylar tasymaldaıtyn avtomobılder, «KAMAZ» júk kóligi, «Iveko» avtobýstary, «Taıga Varıag» qarshanasy berildi.
Qyzmettik mindetterdi oryndaýǵa asa qajetti tehnıkalardy saltanatty jaǵdaıda QR UQK Shekara qyzmeti dırektorynyń orynbasary polkovnık Qanat Aqtanov tapsyrdy.
«Shekara qyzmetin odan ári damytý jáne reforma júrgizý - Qazaqstan Respýblıkasynyń Prezıdenti, Joǵarǵy Bas qolbasshy Nursultan Nazarbaevtyń bergen basty tapsyrmalardyń biri, búgingi tańda bólimshelerdiń ınfraqurylymdaryn nyǵaıtý, shekarany jańǵyrtý, materıaldyq-tehnıkalyq jaǵdaıyn jaqsartý boıynsha jumystar júrgizilip jatyr. Shekara bólimsheleriniń tehnıkalyq jaǵdaıyn jabdyqtaý baǵytyndaǵy sharalar da osynyń quramyna kiredi», - dep atap ótti polkovnık Qanat Aqtanov.
QR UQK Shekara qyzmetiniń avtoparki jyl aıaǵyna deıin alystaǵy shekara zastavalaryndaǵy narıadtardyń jáne shekara bólimsheleriniń sharýashylyq qyzmetterin qamtamasyz etýge qajetti jańa avtotehnıkalarmen tolyqtyrylatyn bolady.
Jalpy aıtqanda, bıylǵy jyly áskerge 600 dana tehnıka beriledi. Shekara qyzmetin tehnıkalyq jaǵynan jabdyqtaý jyl ótken saıyn jaqsartyla túsedi, osylaısha shekara saqshylarynyń áskerı-jaýyngerlik qyzmetiniń nátıjeliligi de kóteriletin bolady.
Qoldaryna jańa tehnıkanyń tizginin ustaǵan shekarashylar da óz kezekterinde mundaı qamqorlyqqa rızashylyqtaryn bildirip, Qazaqstan Respýblıkasynyń memlekettik shekarasyn qorǵaý jónindegi tapsyrmany oryndaýǵa barlyq kúsh-jigerlerin salatyndyqtaryn bildirdi.
