Jańa kodekstiń basty mindeti azamattardyń quqyqtary pen bostandyqtaryn qorǵaý kepildikterin kúsheıtý bolmaq - QR Memlekettik hatshysy

ALMATY. 15 naýryz. QazAqparat - Qazaqstan ádilet organdarynyń qoldanystaǵy qylmystyq-atqarý júıesi budan 18 jyl buryn eleýli ózgeristerge ushyrady jáne 1997 jyly el táýelsizdigin alǵannan keıin alty jyl ótken soń osy saladaǵy kóptegen normatıvtik qujattar qabyldandy.

Degenmen de, ol keńestik kezeńniń kóptegen sıpattaryn muraǵa alyp qaldy - qylmyspen kúres kóbine adam quqyqtaryn saqtaýdan joǵary qoıyldy. Bul týraly búgin Almatyda «Qazaqstannyń qylmystyq-protsessýaldyq zańnamalaryn quqyqtyq memleket prıntsıpteri negizinde reformalaý» taqyrybynda ótken «dóńgelek ústelde» QR Memlekettik hatshysy Marat Tájın málim etti.

«Qazaqstandaǵy táýelsizdik jyldarynda qylmystyq sot isin júrgizýdi quqyqtyq memleket standarttaryna sáıkes keltirý jóninde turaqty jumystar júrgizildi. Eń bastysy - sot júıesiniń táýelsizdigi nyǵaıtyldy, alqabıler soty quryldy, sot sanktsııasymen tutqyndaý engizildi. Sonymen qatar jınaqtalǵan tájirıbe jáne qazirgi júıelik problemalar barǵan saıyn bizdi qylmystyq-protsessýaldyq úderiske túbegeıli reforma jasaý qajettigine ıtermeleýde. Prezıdent Nursultan Ábishuly Nazarbaev óziniń Qazaqstan halqyna jyl saıynǵy Joldaýynda Qylmystyq-protsessýaldyq jańa kodeksti qabyldaý qajettigin aıryqsha atap kórsetti», - dedi M.Tájın.

Memlekettik hatshy jańa kodekstiń basty maqsaty - qylmystyq-protsessýaldyq zańdy halyqaralyq jalpyǵa birdeı normalar men prıntsıpterge neǵurlym jaqyndatý, eskirgen qylmystyq-protsessýaldyq quraldardy neǵurlym tıimdi, aqylǵa qonymdysyna aýystyrý jáne eń bastysy azamattardyń quqyqtary men bostandyqtaryn qorǵaý kepildikterin kúsheıtý bolmaq ekenin atap kórsetti.