Jańa kodeks, sý qoımalar salý, kanal tartý - Sý sharýashylyǵy salasy túbegeıli jańǵyrtylyp jatyr
ASTANA. KAZINFORM – Elimizde sý sharýashylyǵy salasyn basqarý túbegeıli jańǵyrtylyp jatyr. Bul týraly QR SRIM Sý sharýashylyǵy komıtetiniń tóraǵasy Arsen Jaqanbaev aıtty.
– Qazirgi zamanǵy syn-qaterlerge jaýap retinde Qazaqstanda sý sharýashylyǵy salasyn aýqymdy túrde qaıta qurý júzege asyrylyp jatyr. Onyń negizgi baǵyttarynyń biri – sý sharýashylyǵy ınfraqurylymyn salý jáne jańǵyrtý. Aldaǵy ýaqytta jańadan 42 sý qoımasyn salý, 37 gıdrotehnıkalyq qurylymdy rekonstrýktsııalaý, sondaı-aq shamamen 14 myń km sýarý arnasyn salý jáne qaıta jańǵyrtý jumysy josparlanǵan, - dedi ol «Sý resýrstaryn saqtaý jáne sý júıelerin ornyqty basqarý: Jahandyq bastamalardaǵy Qazaqstan róli» atty halyqaralyq konferentsııada.
Sondaı-aq spıker sý sharýashylyǵy salasyndaǵy aýqymdy jobalar týraly aıtty.
– Sý resýrstaryn basqarýdy jetildirý úshin jańa Sý kodeksin ázirledik, ol QR Parlamenti Májilisinde birinshi oqylymnan ótti. 2024-2030 jyldarǵa arnalǵan QR sý resýrstaryn basqarý júıesin damytý tujyrymdamasyn jáne 2024-2028 jyldarǵa arnalǵan Qazaqstannyń sý salasyn damytýdyń keshendi josparyn bekittik. Sondaı-aq ekonomıkanyń barlyq salasynda sýdy únemdeý boıynsha jol kartasyn jasadyq, - dedi komıtet tóraǵasy.
Aıta keteıik, buǵan deıin Islam damý banki qarjysyna elimizde 9 jańa sý qoımasy salynatynyn jazǵan edik.