Jańa kodeks sottalǵandardyń tárbıesine jurtshylyqtyń qatysý tetigin qalyptastyrady
ASTANA. QazAqparat - Búgin Májilistiń Zańnama jáne sot-quqyqtyq reformalar komıtetiniń keńeıtilgen otyrysy ótti. Onda Qylmystyq is júrgizý kodeksi jobasy talqylandy. Eske sala keteıik, Májilis kodeks jobasyn buǵan deıin birinshi oqylymda maquldaǵan bolatyn.
Atalǵan kodeks jobasy sot tóreligin júrgizýdiń tıimdiligin arttyrý, adam men azamattyń konstıtýtsııalyq quqyqtaryn saqtaý jáne qorǵaý kepildigin kúsheıtý maqsatynda qylmystyq sot isin júrgizýdi jańǵyrtýǵa baǵyttalǵan. Bul maqsatta qylmystyq qýdalaýdy bastaý rásimin ońaılatý kózdeledi. Sonymen qatar, tergeý men anyqtaý organdarynyń azamattar quqyqtaryn qozǵaıtyn áreketterdi derbes qabyldaý boıynsha ókilettikteri taryla túsedi. Al advokattar sotqa deıingi is júrgizýden bastap qatysýy keńeıtiledi.
Jalpy, zań jobasy sottalǵandardyń quqyqtary men zańdy múddeleriniń qorǵalý deńgeıin, qylmystyq jazalardy oryndaýdyń tıimdiligin edáýir arttyrýǵa baǵyttalǵan. Osyǵan oraı, zań jobasyn qabyldaý qoǵamnan oqshaýlaýmen baılanysty emes qylmystyq-quqyqtyq sharalardy anaǵurlym keń qoldanýǵa, sottalǵandar men jazasyn óteýden bosatylǵan tulǵalardy áleýmettik beıimdeýge jáne ońaltýǵa, penıtentsıarlyq jáne penıtentsıarlyqtan keıingi qylmystyń qaıtalaný deńgeıin azaıtýǵa jaǵdaılar jasaıdy. Sondaı-aq sottalǵandarmen júrgiziletin tárbıe protsesine jurtshylyqtyń qatysý tetigi qalyptastyrylady.
