Jańa keshen: «QazTransOıl» AQ jumysshylarǵa qolaıly jaǵdaı jasaıdy
ATYRAÝ. KAZINFORM — Atyraý oblysynda «QazTransOıl» AQ (51%) jáne CNPC Exploration and Development Company Ltd (49%) birlesken kásiporny «MunaıTas» SBQK» JShS-na qarasty «Aman» munaı aıdaý stantsııasynda III iske qosý kesheni paıdalanýǵa berildi.
Bul keshenniń qurylysy «Qazaqstan – Qytaı» munaı qubyry ónimdiligin arttyrý baǵdarlamasynyń «Keńqııaq – Atyraý» munaı qubyry reversi jobasy aıasynda júzege asyryldy.
«Aman» munaı aıdaý stantsııasyndaǵy III iske qosý kesheninde óndiristik emes obektiler de ornalasqan. Olardyń ishinde ákimshilik ǵımarat, 74 oryndyq jataqhana, ashana jáne sport alańy bar. Bul nysandar vahtalyq ádispen jumys isteıtin jumysshylarǵa qolaıly jaǵdaı jasaý úshin berildi.
Oǵan qosa «QazTransOıl» AQ Pavlodar munaı qubyry basqarmasynyń «Ekibastuz» munaı aıdaý stantsııasynda zamanaýı servıstik-turmystyq keshenniń qurylysyn aıaqtady. Jańa keshende ashana, ınjenerlik-tehnıkalyq qyzmetkerlerge arnalǵan keńse bólmesi, 35 oryndyq akt zaly jáne demalys bólmesi bar. Barlyq nysandar jıhazdarmen jáne tehnıkamen jabdyqtalǵan.
Sonymen qatar, «QazTransOıl» AQ Aqtóbe munaı qubyry basqarmasynyń «Álibekmola» bas munaı aıdaý stantsııasynda 64 oryndyq úsh qabatty jataqhananyń kúrdeli jóndeý jumystary aıaqtalýda. Ǵımaratty 2024 jyldyń jeltoqsan aıynyń sońyna deıin paıdalanýǵa berý josparlanǵan.
Bul bastamalardyń júzege asýy «QazTransOıl» AQ óz jumyskerlerine qolaıly jaǵdaı jasap, áleýmettik ınfraqurylymdy jaqsartýǵa basty nazar aýdaratynynyń dáleli. Kompanııa jumyskerleriniń ómir súrý sapasyna erekshe nazar aýdara otyryp, kómirsýtegi resýrstardy senimdi jáne tıimdi tasymaldaýdy qamtamasyz etý úshin nysandaryn jańartýdy jalǵastyra beredi.
«KazTransOıl» AQ — magıstraldyq munaı qubyry boıynsha ulttyq operator.
«QazMunaıGaz» UK AQ-tyń enshiles uıymy. Uzyndyǵy 5,4 myń km ártaraptandyrylǵan magıstraldyq munaı qubyrlaryna ıelik etedi jáne 5 myń km-den astam syrt uıymdar qubyrlaryna qyzmet kórsetý boıynsha operatorlyq qyzmetter atqarady.