Jańa kelisim bekitiledi: Qazaqstan azamattarynyń Eýropaǵa saparlaýy jeńildeıdi

ASTANA. KAZINFORM – Eýropa Odaǵynyń Qazaqstanǵa vıza rejımin jeńildetýge arnalǵan qujatqa qol qoıylady.

Jalpy, bul kelisimniń bekitilýi qazaqstandyqtardyń EO elderine saparlaý múmkindikterin keńeıtip, saýda-ekonomıkalyq jáne mádenı-gýmanıtarlyq salalardaǵy iskerlik belsendilikti damytýǵa yqpal etpek.

- Qazaqstan Respýblıkasy men Eýropa Odaǵy arasyndaǵy vıza rejımin jeńildetý kelisimin bekitý boıynsha kelissóz júrgizý mandatyn EO-ǵa múshe memleketter maquldaǵan jáne Eýropalyq Komıssııaǵa joldanǵan. Osy kelisimge qol qoıýǵa arǵalǵan kelissózderde birqatar másele qamtylǵan. Onyń arasynda ótinishterdi qaraý merzimderin qysqartý, qajet qujattar tizbesin qysqartý, vızalyq alymdardy azaıtý, jaramdylyq merzimi uzaǵyraq birneshe ret paıdalanylatyn vızalardy alý múmkindikterin keńeıtý, sondaı-aq ótinish berýshilerdiń jeńildik sanattaryn engizý sııaqty usynystar eskerilgen, - delingen QR Syrtqy ister mınıstrligi málimetinde. 

Vedomstvo aqparatyna qaraǵanda, atalǵan kelisimge qol qoıýdyń naqty merzimi eýropalyq tarappen kelissózder aıaqtalǵannan keıin anyqtalady. 

Eske salsaq, 2023 jyly Qazaqstan men EO vıza rejımin jeńildetý boıynsha resmı kelissózderdi bastaıtynyn jazǵan edik. 

Budan buryn habarlanǵandaı, bıyl naýryz aıynyń aıaǵynda Qazaqstan Prezıdenti Qasym-Jomart Toqaev Eýropa Odaǵynyń Syrtqy ister jáne qaýipsizdik saıasaty jónindegi Joǵarǵy ókili – Eýropalyq komıssııanyń vıtse-prezıdenti Kaıa Kallaspen kezdesti.

EO Joǵarǵy ókili K. Kallas Eýropalyq komıssııa men Qazaqstan arasynda vıza berý tártibin jeńildetý jónindegi kelisimdi bekitý úderisi bastalǵanyn aıtty.