Jańa kedendik kodekstiń artyqshylyqtary qandaı
«Kodekstegi mańyzdy ózgeristerdiń biri - elektrondy kedendik deklaratsııalaýdyń engizilýi. Endi qaǵaz túrindegi deklaratsııalaý tek qana aqparattyq júıe apat bolyp istemeı qalǵan erekshe jaǵdaılarda ǵana júzege asyrylady. Odan bólek, Kodekste «Biryńǵaı tereze» tetigi qarastyrylǵan. Keden organdary memlekettik organdardyń aqparattyq júıelerinen alýǵa bolatyn qujattardy deklaranttan suramaıtyn bolady. Osy eki erejeni júzege asyrý taýarlardy avtomatty túrde shyǵarýǵa múmkindik beredi», - dedi vıtse-mınıstr Ortalyq kommýnıkatsııalar qyzmetinde ótken baspasóz máslıhatynda.
Budan bólek, jańa Kodekste syrtqy ekonomıkalyq qyzmet qatysýshylaryna óz shyǵyndaryn ońtaılandyrýǵa múmkindik beretin tásilder kózdelgen. Buryndary aldyn ala kedendik bajyn tólemeıinshe taýar shyǵarylmaıtyn bolsa, jańa erejege sáıkes, kedendik bajdardy tóleý merzimin bir aıǵa, alty aıǵa uzartýǵa bolady.
«Memleket deklarantqa baj tólemin paıyzdyq ústememen bir aıǵa keıinge qaldyrý quqyǵyn beredi. Jekelegen jaǵdaılarda, máselen, halyqaralyq sharttar aıasynda jetkizilimderdi júzege asyrý, aýyl sharýashylyǵy tehnıkasyn, egin jumysynyń materıaldaryn, asyl tuqymdy janýarlardy ákelýde, tabıǵı apat, zilzala kezinde tóleýshige zalal tıgen jaǵdaıda paıyzdardy tólemeı, baj salyǵyn alty aıǵa deıin bólip tóleý múmkindigi beriledi», - dep túsindirdi B.Bekeshev.
Jańa keden kodeksiniń taǵy bir ereksheligi - baqylaý ýaqytyn qysqartý. Bul týraly QR Qarjy mınıstrligi Memlekettik kirister komıteti tóraǵasynyń orynbasary Ǵosman Ámrın bul ózgeristiń bıznes ókilderiniń usyny ekenin jetkizdi.
«Jalpy keden qyzmetinde, syrtqy saýda salasynda bir-birine qarama-qaıshy eki qıyn máselele bar - baqylaýdy kúsheıtý men keden rásimderiniń ýaqytyn qysqartý. Baqylaýdy kúsheıtsek ýaqyt kóbeıedi. Shynymdy aıtaıyn, bul bıznestiń usynysy boldy. Deklaratsııalaý merzimi 24 saǵattan 4 saǵatqa deıin qysqartyldy. Jalpy baqylaý jumysy on kúnen bes kúnge deıin qysqardy», - dedi ol.
Sondaı-aq, jańa kedendik kodekske sáıkes, dálizder sany kóbeıedi.
«Árıne, kedendik rásimdeý jumystaryn jyldamdatady. Halyqaralyq standarttarda 4 dáliz bar: jasyl jáne qyzyl dálizderdi keziktirgen shyǵarsyz, endi bizge kók (deklaratsııany baqylaý beketine berý) jáne sary (qujattar men málimetterdi tekserý) dálizder qosyldy. Ótken jyly 300 myń taýar jasyl dáliz rejiminde ótken. Bul tasymaldaýshylar ótkizgen barlyq deklaratsııanyń 85 paıyzyn qamtıdy. Demek, qalǵan 15 paıyzy baqylaý beketine jiberilgen. Standarttarǵa sáıkes, qatysýshylar ádil jáne esh quqyq buzbasa, deklaratsııalardyń 95 paıyzy jasyl dálizben ótýi qajet. Bul saýda-sattyqty aıtarlyqtaı jeńildetedi», - dep atap ótti Ǵosman Ámrın.
Jańa kodekske sáıkes, Qazaqstannyń keden salasynda ýákiletti ekonomıkalyq operatorlar ınstıtýtyn jetildirý mindeti qoıyldy.
Ǵusman Ámrınniń aıtýynsha, ýákiletti ekonomıkalyq operator - kez kelgen syrtqy ekonomıkalyq saýda qatysýshysy úshin asa bedeldi mártebe. Olarǵa taýardy deklaratsııalaýǵa deıin qoımadan ákete alady jáne osy arqyly óz shyǵyndaryn azaıtyp, aınalymyn arttyra túsedi. Búginde 7 qazaqstandyq kompanııa ýákiletti ekonomıkalyq operator mártebesin alǵan. Olar - «Rahat» AQ, «Koka-Kola Almaty Bottlers» ÁK JShS, «Evrazıan Fýds» AQ, «Evrazıan Fýds Korporeıshn» AQ, «RG Branes Kazakhstan» JShS, «Azııa Logıstıka» eksportttyq-ımporttyq kompanııasy, «KTZ Express» AQ.
Eske sala ketsek, jeltoqsan aıynda Memleket basshysy Nursultan Nazarbaev kedendik retteý máseleleri boıynsha úsh zań jobasyna qol qoıdy. Atap aıtqanda, «Eýrazııalyq ekonomıkalyq odaqtyń Keden kodeksi týraly shartty ratıfıkatsııalaý týraly» Zań, jańa Kedendik kodeks jáne oǵan ilespe zań.
