Jańa Qazaqstannyń ekonomıkalyq saıasatyn ázirleýge kiristik - Úkimet basshysy

ALMATY. QazAqparat – Ortalyq Azııa elderi sammıtinde Turaqty damý maqsattaryna qol jetkizýdegi progress talqylanady, dep habarlaıdy QazAqparat tilshisi.

Sammıt QR Úkimeti Qazaqstandaǵy BUU Damý baǵdarlamasymen áriptestikte Eýropalyq odaq pen Azııa Damý bankiniń qarjylyq qoldaýymen uıymdastyryldy.

Ekinshi óńirlik Sammıtke óńir elderi úkimetteriniń saıası kóshbasshylary, halyqaralyq sarapshylar, halyqaralyq uıymdar men dıplomatııalyq toptardyń ókilderi, jeke sektordyń basshylary jáne Ortalyq Azııanyń azamattyq qoǵamynyń ókilderi qatysady.

Sammıtke qatysýshylar Ortalyq Azııadaǵy iri jáne shaǵyn qalalardy damytý úshin jergilikti sheshimderdi jáne Turaqty damý maqsattary (TDM) oqshaýlaý arqyly olardyń turaqty damýǵa kóshýin talqylaıdy. Sondaı-aq, jekelegen sessııalar memlekettik qyzmetterdi tsıfrlandyrý, turaqty damý úshin áıelder men jastardyń quqyqtary men múmkindikterin keńeıtý, TDM-dy qarjylandyrý men klımattyq kún tártibimen sınergııasyn qamtamasyz etý, sondaı-aq TDM-ǵa qol jetkizýdi jedeldetý úshin jańa áriptestikterdi qurý máselelerine arnalady.

Sammıtti Qazaqstan Premer-mınıstri Álıhan Smaıylov ashty. Álıhan Smaıylov óz sózinde Qazaqstan BUU-nyń 2030 jylǵa deıingi kún tártibine qol jetkizýdi jaqtaıtynyn, munyń dáleli retinde ulttyq damý strategııalary men baǵdarlamalaryna Turaqty damý maqsattarynyń ındıkatorlarynyń engizilýin atap ótti.

Elimizde qabyldanǵan mindettemelerdi júzege asyrý úshin, Turaqty Damý Maqsattary boıynsha Úılestirý keńesi jumys isteıdi. Sonymen birge, Premer-Mınıstrdiń aıtýynsha, jahandyq ekonomıkadaǵy tereń qurylymdyq ózgerister aıasynda, ulttyq ekonomıkalyq damý saıasatyn orta merzimdi kezeńge beıimdeý qajet boldy.

«Osyǵan baılanysty biz bıznes-qaýymdastyq pen halyqaralyq uıymdar sarapshylarynyń belsendi qatysýymen Jańa Qazaqstannyń ekonomıkalyq saıasatyn ázirleýge kiristik. Osy qujat aıasynda ınvestıtsııalyq ahýal men bıznes-ortany jaqsartý, memlekettiń ekonomıkaǵa qatysýyn azaıtý, ınnovatsııalar men balamaly energııany engizý, jasyl qarjylandyrýdy keńeıtý boıynsha jańa sharalar ázirlenýde», - dep atap ótti Úkimet basshysy.