«Jańa Qazaqstannyń» baǵdary Abaı fılosofııasymen tolyq úndesedi – Erlan Qoshanov
Erlan Qoshanov el taǵdyryn aıqyndaıtyn maqsat-mindetterge toqtalyp, ol jalpyhalyqtyq referendýmnan bastalatynyn atap ótti. Májilis tóraǵasy «Jańa Qazaqstannyń» keleshek kelbeti jaıly oıymen bólisti.
«Rasymen de, Jańa Qazaqstan degenimiz ne? Qazir eń jıi qoıylatyn suraq osy. Prezıdent jýyrda buǵan naqty jaýap berdi. «Ol – Ádiletti Qazaqstan», - dep dóp basyp aıtty. Al, «jańa qazaqstandyq» qandaı bolýy qajet? Muny osy topyraqta týǵan uly Abaı bir jarym ǵasyr buryn aıtyp ketken. Ol – bes nárseden qashyq, bes nársege asyq bolýy kerek. Qarap otyrsańyzdar, Abaı fılosofııasy Prezıdentimizdiń «Jańa Qazaqstan» týraly kózqarasymen tolyq úndesip tur. Sondyqtan, jastardy bilimge, eńbekke baýlý, osy bes qasıetti boıyna sińirý mańyzdy», - dedi Palata spıkeri.
Májilis tóraǵasy Prezıdent reformalarynyń jańa múmkindikterge jol ashatynyn aıtyp, aldaǵy ýaqytta Parlamenttiń róli kúsheıetinine, elimizdiń saılaý júıesine de birqatar ózgerister bolatynyna mán berdi. Ásirese, ákimder saılaýy – kópshilikti qyzyqtyratyn taqyryptardyń biri ekenine nazar aýdardy.
«Bul taqyryp el arasynda jıi aıtylyp júr. Biz oǵan kezeń-kezeńmen kele jatyrmyz. Byltyr elimizde 1 myńǵa jýyq aýyl ákimin halyqtyń ózi saılady. Keler jyly aýdan ákimderin saılaýǵa kirisemiz. Aldaǵy kezeńderde búkil aýyl, aýdan, qala ákimderin halyq tikeleı saılaıtyn bolady. Oblys basshylaryn taǵaıyndaý máselesine keler bolsaq, buryn Prezıdent usynǵan jalǵyz kandıdat 20-30 oblystyq máslıhat depýtatymen kelisiletin. Endi Memleket basshysy tarapynan kem degende eki úmitker usynylady. Ony barlyq deńgeıdegi máslıhattar, aýdan, qala, oblys depýtattary tańdaıtyn bolady», – dedi.
Memleket basshysy Qasym-Jomart Toqaevtyń bastamasymen qazir elimizde aýqymdy ózgerister bolyp jatqanyn aıtyp, óńir halqyn Abaı oblysynyń qurylýymen quttyqtady.
«Semeı – Alash arystarynyń basyn qosqan qazaq rýhanııatynyń qara shańyraǵy. Sondyqtan, tarıhı turǵydan qaraıtyn bolsaq, aýmaqtyq jaǵynan, halyq sany jaǵynan alsaq ta, ádil sheshim boldy dep oılaımyn. Endeshe, sizderdi sol tarıhı ádilettiliktiń ornaýymen shyn júrekten quttyqtaımyn. Abaı óńiri, Semeı jeri tarıhtyń jańa paraǵyn ashty. Biz Abaı oblysynyń shańyraǵyn halqymyzben, Prezıdentimizben birge kóteremiz. Osy iste Parlament Májilisi, «AMANAT» partııasy da sizdermen birge bolady», – dedi.
Májilis tóraǵasy Semeı qalasyndaǵy jedel medıtsınalyq járdem aýrýhanasy ujymymen kezdesti. Elimiz boıynsha qabyrǵa materıaldaryn shyǵaratyn iri kásiporyndardyń biri - «Sılıkat» zaýytynda boldy. Múgedekterge arnalǵan 150 oryndyq ońaltý ortalyǵynyń qurylysymen tanysty. Sondaı-aq, Abaı aýdanyndaǵy Qaraýyl aýylyna bardy.
«Elimizde Qaraýyldy bilmeıtin qazaq joq shyǵar. Bul – adamzatqa ǵulama Abaıdy syılaǵan qasıetti topyraq. Osynda sizdermen júzdeskenime qýanyshtymyn. «Jańa Qazaqstan» qurýǵa baǵyttalǵan Memleket basshysynyń saıası reformalary tóńireginde ózderińizben áńgimelesý úshin arnaıy keldim. Prezıdent el taǵdyryn – qalyń jurttyń ózi sheshkenin qalap otyr. Osynaý jaýapty kezeńde halyq pen bılik birtutas bolýymyz kerek. Osy joldy Memleket basshysyna qoldaý bildirip, referendýmǵa bir kisideı atsalysýǵa, tarıhı tańdaý jasaýǵa shaqyramyn», – dedi Erlan Qoshanov.
Kezdesýge kelgen zııaly qaýym ókilderi Abaı aýdany jurtshylyǵynyń reformalardy jaqsy qabyldap jatqanyn jáne onyń mańyzyn eskere otyryp, aldaǵy referendýmǵa atsalysatyndaryn aıtty.
«Bul reformalardyń bári halyqtyń kókeıinde júrgen suraqtarǵa jaýap beredi. Biz ony jaqsy túsinemiz. Eldiń ıesi, jerdiń ıesi – halyq degen sóz júregimizge jaqyn tıdi. Prezıdentimiz jumysqa kirisken kúnnen bastap osy demokratııalyq protsesterdiń júzege asýyn sóz etip júr. Biz ony tolyq qoldaımyz», – dedi Abaı aýdanynyń qurmetti azamaty Amantaı Muqataev.
Kezdesýde Prezıdentke Abaı oblysynyń qurýǵa uıytqy bolǵany úshin kúlli aýdan atynan alǵys ta aıtyldy.
«Oblysymyz qurylyp jatyr. Zor maqtanyshpen, úlken úmitpen qarap otyrmyz. Prezıdentimiz Qasym-Jomart Kemelulyna bizdiń sálemimizdi jetkizińiz. Abaılyqtar men Abaı urpaqtary sheksiz alǵysyn bildiredi», – dedi Abaı aýdanynyń qurmetti azamaty Tólegen Janǵalıev.
Sonymen qatar, Májilis Tóraǵasy Qaraýylda ornalasqan Abaı atyndaǵy mektep-gımnazııasyn aralap, muǵalimdermen jáne oqýshylarmen kezdesti.
Aıta keteıik, Májilis spıkeri, «AMANAT» partııasynyń tóraǵasy Erlan Qoshanov fraktsııa jınalysyn ótkizip, saıası reformalar aıasynda depýtattar aldyndaǵy jańa mindetterdi aıqyndaǵan bolatyn.
