Jańa qazaqstandyq telearna 27 naýryzdan habar tarata bastaıdy
ASTANA. QazAqparat - «Habar» telearnasy taǵy bir arnamen tolyǵa túspek. 27 naýryz kúni «Qazmedıa Ortalyǵy» ǵımaratynda «El arna» telearnasynyń tanystyrylymy ótedi.
Atalmysh telearna otandyq kórkem fılmder men teleserıaldardy taratady. Jalpy alǵanda «El arna» ataýy kópshilikke keńinen tanymal. Alaıda onyń qamtıtyn taqyryptary múldem ózgergen.
«Munda materıaldardyń basym bóligin nemese 80 paıyzyn kórkem fılmder qurasa, 20 paıyzy dokýmentalıstıkamen baılanysty bolady. Qazaqstandyq týyndylar men otandyq serıaldar kórsetiledi»,-dedi aǵa redaktor Álııa Baltabaeva.
«Biz sonymen qatar avtorlyq fılmderdi de nazarǵa almaqpyz. Bul jerde 40-shy jyldardyń týyndylary men «Qazaqfılm» kınostýdııasynyń qazaq jáne orys tilderindegi «altyn qory» saqtalady. «El arna» telearnasynyń jumys kestesi jas erekshelikterine qarmastan barlyq kórermenderge qyzyqty bolatyndaı etip uıymdastyrylǵan. Tuńǵysh bolyp efırge Qazaq valsiniń koroli atanǵan áıgili kompozıtor Shámshi Qaldyaıaqov týraly kórkem fılm kórsetiledi.
Telearna rejısseri Baıan Qyzylovanyń sózinshe, basty nazar beınelendirý jumystaryna aýdarylǵan. Sonymen qatar telearnanyń logotıpi men bazalyq túsi ózgergen. 27 naýryz kúni saǵat 18-00-den bastap árbir kórermen telearnanyń jańa kelbetine baǵa bere alady.
