Jańa Qazaqstandy órkendetýge azamattarymyzdyń kóbi súbeli úles qosty – Memleket basshysy
Qasym-Jomart Toqaev óz sózinde saltanatty jıynǵa qatysýshylardy Qazaqstan Táýelsizdiginiń 30 jyldyǵymen quttyqtap, bul merekeniń ult mereıin ósiretin ulyq meıram ekenin atap ótti.
«Biz tarıh turǵysynan alǵanda qysqa merzim ishinde jańa Qazaqstannyń negizin qaladyq. Tuǵyry berik, ekonomıkasy qýatty, bedeli bıik memleketke aınaldyq. Munyń bári, eń aldymen, Elbasy Nursultan Ábishuly Nazarbaevtyń kóregen saıasatynyń jemisi. Sonymen birge, búkil halqymyzdyń eren eńbeginiń nátıjesi. Kez-kelgen halyqtyń tabysqa jetýi azamattaryna baılanysty. Bul – ómirdiń zańy. Adam kapıtaly myqty memleket barlyq qıyndyqty eńsere alady. Táýelsizdik kezeńinde halqymyz eldiktiń biregeı úlgisin kórsetti. «Eńbek – yrystyń bulaǵy, baqyttyń shyraǵy» dep beker aıtylmaǵan. Shyn máninde, bizdiń búgingi jetistigimiz – barsha halqymyzdyń ortaq jeńisi. Jańa Qazaqstandy órkendetýge azamattarymyzdyń kóbi súbeli úles qosty. Búgingi mereıli sátte elimizdiń barsha azamattaryna tabandy eńbegi úshin zor alǵys aıtamyn», – dedi Prezıdent.
Qasym-Jomart Toqaev Táýelsizdiktiń 30 jyldyǵy kópǵasyrlyq memlekettiligimizdiń mańyzdy kezeńi jáne zamanaýı Qazaqstan jylnamasyndaǵy aıtýly beles ekenine toqtaldy. Onyń aıtýynsha, osy jyldar ishinde elimiz zor jetistikterge qol jetkizgen, kúrdeli syn-qaterlerdi eńsergen úlken joldan ótti.
«El azamattarynyń basym kópshiligi ózderiniń qajyrly eńbegimen qýatty ári damyǵan memleket qurý isine eleýli úles qosyp keledi. Búgin ózderińizdi marapattaı otyryp, Qazaqstandy kórkeıtýge úles qosqan barlyq azamatqa rızashylyq bildiremiz. Sizder naǵyz otanshyldyqtyń, kásibı bilik pen adal eńbektiń ozyq úlgisin kórsettińizder. Óskeleń urpaq ózderińizge qarap boı túzeıdi. Osydan bir jyl buryn men úlken mereıtoıdy shýsyz, dańǵazasyz, ysyrapsyz naqty jumystarmen atap ótý qajettigi týraly aıttym. Táýelsizdigimizdiń 30 jyldyǵynda jańa, aýqymdy reformalar qolǵa alyndy. Sondyqtan, bul jyldy nátıjeli boldy deýge tolyq negiz bar. Biz ekonomıkany jáne áleýmettik salany jan-jaqty jańǵyrtyp jatyrmyz. Іndetke qaramastan, memleket otandyq bızneske qoldaý kórsetýde», – dedi Memleket basshysy.
Prezıdent ekonomıkany jáne áleýmettik salany jańǵyrtý máselesine, sonyń ishinde ónerkásiptiń, aýyl sharýashylyǵynyń, qurylys salasynyń, qarjy sektorynyń qarqyndy damýyna nazar aýdardy. Óńirlerde iri ınfraqurylymdyq jobalar júzege asyrylyp jatyr. Bilim berý jáne densaýlyq saqtaý salalarynda keshendi transformatsııa jalǵasýda. Memleket zeınetaqy, járdemaqy jáne eńbekaqy kólemin turaqty túrde arttyryp, óziniń áleýmettik mindettemelerin oryndaýda.
«Memlekettik basqarý júıesinde aýqymdy ózgerister boldy. Men halyqtyń turmys sapasyn arttyrýǵa jáne elimizdiń básekege qabilettiligin kúsheıtýge baǵyttalǵan 10 ulttyq jobany bekittim. Qoǵamdyq-saıası salada eleýli ózgerister jasalýda. Men usynǵan saıası reformalar toptamasy kezeń-kezeńimen júzege asyrylyp jatyr. Biz Táýelsiz Qazaqstan tarıhynda alǵash ret aýyl ákimderiniń tikeleı saılaýyn ótkizdik. Bıyl maýsym aıynda adam quqyqtary salasyndaǵy aldaǵy sharalar týraly Jarlyqqa qol qoıdym. Bul qujat quqyq qorǵaý salasyn keshendi túrde jańǵyrtýǵa baǵyttalǵan. Qoǵamdyq dıalogty birtindep damytý úshin naqty sharalar qolǵa alynyp jatyr. Munyń bári azamattarymyzdyń sheshim qabyldaý jáne memlekettik basqarý isine belsene qatysýyna jol ashady. Bizdiń maqsatymyz – tıimdi memleket jáne ádiletti qoǵam qurý. Bul strategııalyq baǵyt ózgermeıdi. Aldymyzda halyqtyń ál-aýqatyn odan ári arttyrý, qasıetti Táýelsizdigimizdi nyǵaıtý jónindegi aýqymdy mindetter tur», – dedi Qasym-Jomart Toqaev.
Memleket basshysy Parlamenttiń qos palatasynyń tóraǵalaryna, Premer-Mınıstrge jáne Memlekettik hatshyǵa Táýelsizdik kúni qarsańynda jergilikti turǵyndarmen kezdesý úshin aımaqtarǵa baryp, eńbegimen erekshelengen azamattarǵa memlekettik nagradalar tabystaý jóninde bergen tapsyrmasy týraly aıtty.
