Jańa Qazaqstandy birge quraıyq: Qazaqstan halqy Assambleıasy halyqqa úndeý jasady
«2022 jyldyń alǵashqy kúnderinde halqymyz kúrdeli synı sátti bastan keshti. Qazaqstan Prezıdenti Qasym-Jomart Toqaevtyń tabandy jáne ýaqytyly júzege asyrǵan sheshimderiniń, sondaı-aq qazaqstandyqtardyń birligi men tatýlyǵynyń arqasynda biz tarıhymyzdaǵy kúrdeli kezeńdi eńsere aldyq. Osy kúnderi Qazaqstan halqy Assambleıasynyń músheleri Prezıdentpen, halyqpen birge bolyp, búginde qalpyna keltirý jumystaryna belsendi qatysýda. Sondaı-aq «Qasiretti qańtar» sabaqtary bizdi el damýynyń bolashaq baǵdaryn tereń uǵynýǵa mindettedi. Eń bastysy kúndelikti ómirimizde beıbitshilik, birlik jáne qoǵamdyq kelisim sııaqty basty qundylyqtar qoǵam órkendeýiniń irgeli negizderi bolyp tabylatynyn aıqyn kórsetti», - delingen úndeýde.
Sondaı-aq Qazaqstan halqy Assambleıasynyń basshylyǵy men músheleri, Prezıdent kótergen bastamalardy tolyq qoldap, ortaq isti barsha bolyp jumylyp júzege asyrýǵa shaqyryp otyr.
«Búginde biz áleýmettik ádilettilik, halyqtyń ál-aýqaty jáne qoǵamdaǵy birlik pen qaýipsizdikti nyǵaıtý mańyzdy ról atqaratyn jańa Qazaqstandy qurý qarsańynda turmyz. Sonymen birge eldiń saıası júıesin odan ári demokratııalandyrý jáne jalpy Qazaqstandy damytý úderisi júrgiziletin bolady. Memleket basshysynyń tapsyrmasy boıynsha «Qazaqstan halqyna» qoǵamdyq áleýmettik qory quryldy. Bul uıym densaýlyq saqtaý, bilim berý jáne áleýmettik qoldaý, mádenıet jáne sport sııaqty salalarda Qazaqstan halqyna áleýmettik kómek kórsetý boıynsha mindetterdi oryndaıtyn bolady. Sonymen qatar tek qaıyrymdylyq uıymy ǵana emes, bizdiń ortaq áleýmettik jaýapkershiligimizdiń jalpyulttyq ınstıtýty dep esepteımiz», - deıdi Assambleıa músheleri.
Odan bólek, úndeýde qaıyrymdylyq sharasy Qazaqstan halqy Assambleıasy qyzmetiniń basymdy baǵytarynyń biri bolyp qala beretindigi aıtylǵan.
«Biz, Qazaqstan halqy Assambleıasynyń músheleri, eldegi beıbitshilikti, qoǵamdyq kelisim men jalpyulttyq birlikti nyǵaıtýdaǵy jaýapkershilikti sezine otyryp, Memleket basshysynyń jańa Qazaqstandy qurýdaǵy júıeli bastamalaryn is júzinde oryndaý barysynda barlyq azamattardy toptasýǵa shaqyramyz. Otanymyzdyń tarıhyndaǵy osy jaýapty kezeńde árqaısymyz Táýelsizdigimizdiń basty qundylyǵy – birlik pen kelisimdi kózdiń qarashyǵyndaı saqtaıtyndyǵyna kámil senemiz! Jańa Qazaqstandy birge quraıyq!», - degen úndeý tastady Qazaqstan halqy Assambleıasy halyqqa.
