«Jańa Qazaqstanda» ár adam ózgeristi ózinen bastaýy kerek - eńbek ardageri
«Aqtóbe» telearnasynyń «Sáti túsken suhbat» baǵdarlamasyna eńbek ardageri Nurhan Aǵnııazov qatysty.
Ol Prezıdent Qasym-Jomart Toqaevtyń QR Parlamenti Májilisiniń otyrysyndaǵy aıtqan tuşymdy oıy men alda atqarylar jumystar jaıyna toqtaldy.
Ásirese «Qańtar oqıǵasy» sabaǵy shyn máninde jańa bastamalardyń bastamasy bolatynyna senim bildirdi.
«Prezıdent óz sózinde «Ekonomıkany ártaraptandyrý – kúrdeli mindet. Ártaraptandyrý bolmasa, azamattarymyzdyń ál-aýqatyn arttyryp, turaqty jumys oryndaryn ashý múmkin emes. Bul jumystyń basty baǵyty – óńdeý ónerkásibin damytý. Degenmen, el ekonomıkasyndaǵy óńdeý ónerkásibiniń úlesi aıtarlyqtaı ósti dep aıtýǵa kelmeıdi. Biz áli kúnge deıin birqatar ónim túrinen ımportqa táýeldimiz.Jyl ótken saıyn elimizdiń tólem balansynda ótkir tapshylyq baıqalýda. Alıýmınııden, mystan jasalǵan daıyn buıymdar jáne mashına jasaý salasyna qajetti jabdyqtar áli kúnge deıin shetelden ákelinedi» dep aıtty. Shyn máninde de ekonomıka ártaraptandyrylyp, shaǵyn jáne orta bızneske kóp kóńil bólýimiz kerek. Bul jumys qaǵaz júzinde emes, naqty iske asyrylsa ǵana tıimdi. Men Prezdentti qoldaımyn, onyń osy jolyn durys deımin. Árýaqytta jaqsy ózgerister ákeletinine senimim mol. Dattap, tyrnaq astynan kir izdemeı, bolashaqqa senimmen qarap, bolashaǵymyz jaryq bolýy úshin bárimiz de atsalysýymyz kerek. Onyń árkim mindetti túrde ózinen bastaýy kerek», - dedi eńbek ardageri Nurhan Aǵnııazov.
Ol memlekettik baǵdarlamalardy iske asyrý kezinde kóp kedergilerdiń adam jolyn kesetinin jasyrmady.
Sondyqtan aldymen jemqorlyqpen kúres jolynyń ashyq bolǵanyn qalaıdy.
«Birinshiden, jemqorlyqpen kúres jumysy. Biz kóp jaǵdaıda boldyrmaý jolyn emes, bolǵan soń jazalaýǵa kóshkenbiz. Ekinshiden, ýrbandalý dep aýyl halqy qalaǵa údere kóship jatyr. Aýyl qańyrap qaldy. Al qalada óz ornyn tappaı júrgen jastar kóp. Sol sebepti aýyldy damytýymyz kerek. Baǵdarlamalar sóz júzinde emes, is júzinde iske asyrylýy tıis. Iá, talaı baǵdarlama boldy. Keıbiri qaǵaz júzinde iske assa, al ekinshileri qaǵazbastylyqqa toly. Óz isin bastap, grant alǵysy kelse, esik qaǵyp, tabaldyryq tozdyryp júrdi. Sondyqtan atqarýshy bılik jumys tásilin ózgertýi kerek. Aıtqym kelgeni, Jańa Qazaqstanda bir bólshekti emes, túbegeıli ózgerýimiz kerek. Bılik te, halyq ta, jas ta ózgerip, bári bir bolýy kerek. Meniń ózimniń úmitim bar, senemin», - dedi Nurhan Aǵnııazov.