«Jańa Qazaqstan» modelinde Parlamentke kóp aýyrtpalyq túsedi – Saıasat Nurbek

NUR-SULTAN. QazAqparat – «Jańa Qazaqstan» modelinde Parlamentke kóp aýyrtpashylyq túsedi. Bul týraly búgin Senat janynan qurylǵan «Ulttyq múdde» dıalog alańynyń birinshi otyrysynda Májilis depýtaty Saıasat Nurbek aıtty, dep habarlaıdy QazAqparat tilshisi.

«Keshegi Joldaýdyń negizgi usynystary – Parlamenttiń rólin kúsheıtý, Prezıdenttik modeldi sál ózgertý, máslıhattardyń jáne saılaý zańnamasynyń ózgerisi. Konstıtýttsııa boıynsha Parlamenttiń eki qyzmeti bar edi ǵoı. Zań shyǵarýshy jáne ókilettik róli. Zań shyǵarýshy qyzmetin osy ýaqytqa deıin atqaryp kelgenimen, ókilettik róli álsiz bolatyn. Sondyqtan osy qyzmetin qazir jandandyrý kerek. Osyǵan oraı meniń birneshe usynysym bar. Birinshi, parlamentarızm mádenıetin qaıtarýǵa tıispiz. Qazirgi tańda Parlamenttiń álsiz tusy – onyń saraptamalyq, derbes, táýelsiz kúshi bolmaýy. Máselen, AQSh-tyń Kongresine qaraıtyn bolsaq, myqty saraptamalyq qyzmet ortalyǵy bar. 2014 jyly sony zerttegenbiz. Sondyqtan aqyryndap saraptamalyq zertteý ortalyǵyn qalyptastyrsa degen oıdamyn», - dedi ol.

Májilis depýtaty ekinshi usynysy retinde Parlamentke Reseıdegideı «sarapshy saǵaty» formatyn engizý kerektigin aıtty. Oǵan myqty sarapshylardy tartý qajet.

«Prezıdent Joldaýynda málimdegendeı, «Jańa Qazaqstan» modelinde Parlamentke kóp aýyrtpalyq túsedi. Parlament soǵan daıyn bolýy kerek. Іshki resýrstaryn rettep, qoǵamdyq palata ma, sondaı dúnıelerdi ashpaı bolmaıtyn sııaqty», - dedi Saıasat Nurbek.