Jańa Qazaqstan azamattaryna arnalǵan «Abaıdyń kisilik kodeksi» qurastyryldy

Bul týraly onlaın brıfıng barysynda ál-Farabı atyndaǵy QazUÝ janyndaǵy Abaı ǵylymı-zertteý ınstıtýtynyń jetekshi ǵylymı qyzmetkeri, fılologııa ǵylymdarynyń kandıdaty, dotsent Láıla Musaly málim etti, dep habarlaıdy QazAqparat tilshisi.

Spıkerdiń sózinshe, 2009 jyly qurylǵan Abaı ınstıtýty óz jumysyn úzdiksiz jalǵastyryp keledi. Negizgi baǵyty – uly aqynnyń ómiri men shyǵarmashylyq murasyn qoǵamdyq gýmanıtarlyq ǵylym salalarynyń toǵysynda zertteý.

«ǴZI elimizde alǵash ret «Abaıtaný. Tańdamaly eńbekter» atty 50 tomdyq jınaqty qurastyryp shyqty. Tańdamaly eńbekterdiń» 50 tomdyq basylymy negizinde iriktelip «Abaıtaný antologııasynyń» 10 tomdyǵy daıyndaldy»,- deıdi ol.

Sonymen qatar, ol Jańa Qazaqstan azamattaryna arnalǵan «Abaıdyń kisilik kodeksi» qurastyrylǵanyn málim etti.

Aıtýynsha, bul qazirgi qoǵamnyń áleýmettik minez-qulqyn retteıtin zańdyq kúshi bar qujat.

«Abaıdyń kisilik kodeksi» - Abaıdyń tańdamalyq danalyq jáne qara sózderindegi kemel adam, tolyq adam qalyptasyp shyǵý jolyndaǵy halyqqa aıtqan ósıetteri iriktelip alyndy», – dedi Láıla Musaly.

Spıker sondaı-aq Abaıtaný antologııasy atty ıntellektýaldyq bazasy ashylǵanyn jetkizdi. Bul baza Qazaqstannyń bilim jáne ǵylym júıesi úshin, jalpy dúnıejúzi qazaqtaryna jol ashatyn ıgilikti úlken bazaǵa aınalýy tıis.

«Memleket basshysy aldaǵy ýaqytta gýmanıtarlyq pánderdiń bólinbes bólshegi retinde Abaıtaný kýrsyn oqytý kerek dep naqty mindet qoıdy. Osy baǵytta QazUÝ janynda Abaı ǵylymı-zertteý ınstıtýty oıshyl aqynnyń murasy men Abaıtaný boıynsha eńbekterdi ǵylymı aınalymǵa engizý maqsatynda naqty jumystar atqaryp keledi. Abaı ilimin bilý jobasy aıasynda Abaı toksanomııasy máselesi kóterilýde. Abaı taksonomııasy atty jańa ǵylymı baǵytty negizdep jatyrmyz. Osy jumystardyń aıasynda tek KazUÝ-de ǵana emes, barlyq JOO-da jalpy bilim beretin pánder qataryna qosýdy usynamyz», - dedi Láılá Musaly.

Aıta keteıik, elimizde 2020 jyly Úkimet qaýlysymen 10 tamyz - Abaı kúni dep belgilendi.