Jańa qaýip: AQSh áýejaılarynda COVID‑19 jańa sabvarıanty anyqtaldy
ASTANA. KAZINFORM — CDC (Aýrýlardy baqylaý jáne aldyn alý ortalyǵy) málimetine sáıkes, NB.1.8.1 dep atalǵan bul jańa shtamm sheteldik jolaýshylardan alynǵan synamalarda Kalıfornııa, Vashıngton shtaty, Vırdjınııa jáne Nıý-Iork mańyndaǵy áýejaılarda tabyldy, dep jazdy Hindustantimes.com saıty.
Bul varıant Qytaı men Azııanyń basqa bólikterinde tez taralyp jatyr. Testileý 22 sáýir men 12 mamyr aralyǵynda júrgizilgen. Japonııa, Ońtústik Koreıa, Frantsııa, Qytaı sııaqty birneshe elge saıahat jasaǵan adamdarmen baılanysty bolǵandarda anyqtalyp otyr.
Keıbir AQSh shtattary – Ońtústik Ogaıo, Rod-Aılend jáne Gavaıı – da áýejaıǵa tikeleı baılanysy joq alǵashqy jaǵdaılardy tirkedi. Kalıfornııa men Vashıngton shtattarynda alǵashqy oqıǵalar naýryzdyń sońynda jáne sáýirdiń basynda tirkelgen.
Júıelik densaýlyq saqtaý jaǵdaıy
-
Gonkong: COVID naýqastarynyń sany kúrt ósip, aýrýhanalarda oryn tapshy. Adamdardan ásirese kóp jınalatyn jerlerde jáne qoǵamdyq kólikte betperde taǵý talap etilip otyr.
-
Taıvan: Aýrýdyń aýyr túrimen jatqan naýqastar kóbeıip, vaktsına men em-dom qoryn arttyrýǵa kóńil bólingen.
Alǵashqy zertteýler NB.1.8.1 shtammynyń taralý jyldamdyǵy joǵary ekenin kórsetti, biraq aýyrlyǵy jaǵynan burynǵylardan aıtarlyqtaı ózgeshe emes. Bul varıant JN.1 tobynan týyndaǵan jáne qoldanystaǵy vaktsınalar oǵan qarsy da qorǵanys beredi dep esepteledi.
Vaktsınalardy jańartý máselesi
AQSh densaýlyq saqtaý salasynyń mamandary kúz ben qysta qoldanylatyn COVID-19 vaktsınalaryn qaıta qaraýdy josparlap otyr. Keıbir sarapshylar jańa LP.8.1 varıantaǵa baǵyttalǵan vaktsına nusqasyna kóshý qajet ekenin alǵa tartyp, bul NB.1.8.1-ge de qarsy ımmýnıtetti kúsheıtedi deıdi .
Qazirgi ýaqytta AQSh-taǵy COVID kórsetkishteri tómendedi, biraq mamandar vırýstyń maýsymdyq sıpattamalary men jańa nusqalaryn únemi baqylaýda ustaıdy .
Dúnıejúzilik densaýlyq saqtaý uıymynyń pikirinshe, bul shtamm alǵash ret 22 qańtar 2025 jyly anyqtalǵan. Uıym vırýstyń NB.1.8.1 nusqasyn 2025 jylǵy 23 mamyrda «baıqalyp otyrǵan varıant» (Variant Under Monitoring) retinde tirkedi.
Eske sala keteıik, buǵan deıin Azııada COVID-19 juqtyrǵandar sany kóbeıip bara jatqanyn jazǵan edik.