Jańa qaýly: Shyǵys Qazaqstanda keıbir shekteýler alynyp tastaldy

ÓSKEMEN. QazAqparat – Shyǵys Qazaqstan oblysynda karantın shekteýleri jeńildetildi, dep habarlaıdy QazAqparat tilshisi.

ShQO Bas memlekettik sanıtarlyq dárigeriniń jańa qaýlysy jarııalandy. Onda jazylǵandaı, óńir boıynsha birqatar karantın shekteýi jeńildetildi.

«17 naýryzdan bastap oblystaǵy obektiler óz qyzmetin «jasyl» aımaq úshin kózdelgen ólshemsharttar negizinde júzege asyrady. «Ashyq» mobıldi qosymshasyn qoldaný, áleýmettik qashyqtyqty saqtaý, mindetti termometrııany júrgizý jáne ashyq aýada maska taǵý talaptary alynyp tastaldy. Sondaı-aq COVID-19-ǵa qarsy vaktsına almaǵan qyzmetkerler úshin kúndizgi rejımdegi jumysqa barýǵa ruqsat berildi», - delingen qujatta.

Vahtalyq ádispen jumys isteıtinder vahtaǵa kirý jáne shyǵý kezinde PTR ádisimen mindetti zerthanalyq testileý tapsyrmaıdy.

«Berilgen kúnnen bastap 3 táýlikten aspaıtyn ýaqyt ótken PTR ádisimen COVID-19-ǵa zerthanalyq tekserý týraly qujattyń, koronavırýsqa qarsy vaktsınatsııanyń tolyq kýrsyn alǵanyn nemese revaktsınatsııany rastaıtyn qujattyń bolý talaby birqatar sanattaǵylar úshin joıyldy. Atap aıtqanda, merzimdi áskerı qyzmetten keıin bólimderden keter aldynda áskerden bosatylǵan adamdar, medıtsınalyq uıymdardaǵy emdelýshiler, bala kútimi boıynsha jatqyzylǵandar, shuǵyl jáne josparly statsıonarǵa jatqyzylǵan júkti áıelder, QAJ mekemelerindegi sottalǵandarǵa uzaq merzimdi kezdesýge kelgen týystary», - delingen qaýlyda.