Jańa qaýly: ShQO-da tamaqtaný oryndary qalaı jumys isteıdi

ÓSKEMEN. QazAqparat – Shyǵys Qazaqstan oblysynyń Bas sanıtar dárigeri «jasyl» jáne «sary» mártebesi bar eldi mekenderdegi nysandardyń jumys rejımi týraly aıtty, dep habarlaıdy QazAqparat tilshisi.

Qazirgi ýaqytta koronavırýstyń taralýyna baılanysty epıdemııalogııalyq jaǵdaı boıynsha Shyǵys Qazaqstan oblysy «jasyl» aımaqta, al Óskemen, Semeı qalalary men Aıagóz aýdany «sary» aımaqta tur.

23 mamyrdan bastap oblystyń Bas sanıtar dárigeriniń nysandar jumysyn retteýge qatysty jańa qaýlysy kúshine enedi. Osyǵan oraı onlaın formatta ótken baspasóz máslıhaty barysynda ShQO Sanıtarııalyq-epıdemıologııalyq baqylaý departamentiniń basshysy Qanat Turdıev shekteýler men jeńildikter týraly túsindirip ótti.

«Óskemen, Semeı shaharlary men Aıagóz aýdanynan basqa qala-aýdandarda jabyq mekemelerde, dinı obektilerde, kelýshilerdi 100 adamnan, jalpy toltyrylýyn 30 paıyzdan asyrmaı ujymdyq sharalar ótkizýge ruqsat etiledi. Qoǵamdyq tamaqtaný oryndary túngi saǵat 02.00-ge deıin ashyq bolady. Sonymen qatar bılıard, boýlıng ortalyqtarynyń, oıyn klýbtarynyń, balalarǵa arnalǵan oıyn-saýyq ortalyqtary men jabyq attraktsıondardyń jumysyna ruqsat berilgen», - dedi ol.

Al «sary» aımaqtaǵy meıramhanalar men dámhanalar 24.00-ge deıin kelýshilerdi qabyldaıdy. Biraq jabyq mekemeler men dinı obektilerde ujymdyq sharalardy ótkizýge tyıym salynǵan. Sondaı-aq bılıard, boýlıng ortalyqtary, oıyn klýbtary, balalarǵa arnalǵan oıyn-saýyq ortalyqtary men jabyq attraktsıondar ázirge jumys istemeıdi.