Jańa qaýly: ShQO-da múgedekterge arnalǵan ońaltý ortalyqtarynda karantın engizildi
ÓSKEMEN. QazAqparat – Shyǵys Qazaqstan oblysyndaǵy múgedekterge arnalǵan ońaltý ortalyqtarynda karantın engizildi, dep habarlaıdy QazAqparat tilshisi.
ShQO bas memlekettik sanıtar dárigeri mindetin atqarýshynyń jańa qaýlysy jarııalandy. Onda statsıonarlyq sıpattaǵy qyzmet kórsetetin emdeý mekemeleri men medıtsınalyq-áleýmettik obektilerde (ortalyq qyzmetkerleri 14 kún turatyn statsıonarlyq úlgidegi arnaıy áleýmettik qyzmet kórsetý ortalyqtarynda, onyń ishinde balalar ortalyqtarynda) jáne múgedekterge arnalǵan ońaltý ortalyqtarynda karantın engizilip, sanıtarlyq-dezınfektsııalyq rejımniń kúsheıtilgeni jazylǵan.
«Sonymen qatar balalarǵa arnalǵan arnaıy jáne mamandandyrylǵan uıymdarda, erekshe bilim berýdi qajet etetin balalarǵa arnalǵan arnaıy mektep-ınternattarda, jalpy úlgidegi jáne daryndy balalarǵa arnalǵan mektep-ınternattarda, sábıler men balalar úılerinde, jartylaı statsıonarlyq úlgidegi arnaıy áleýmettik qyzmet kórsetetin balalar ortalyqtarynda, turǵylyqty jeri joq adamdardy qaıta áleýmettendirý jáne beıimdeý ortalyqtarynda sanıtarııalyq-dezınfektsııalyq rejım kúsheıtildi. Berilgenine 3 kún aspaǵan, teris nátıjesi bar PTR synamany usynǵan azamattarǵa asyrap alý, qorǵanshylyqty nemese qamqorshylyqty belgileý maqsatynda jetim balalarmen kezdesý úshin sábıler jáne balalar úılerine barýyna ruqsat etiledi» delingen qujatta.
