Jańa qaýly: Pavlodarda karantın shekteýleri qatańdatyldy
Pavlodar oblysy Bas memlekettik sanıtarlyq dárigeri mindetin atqarýshynyń jańa qaýlysy jarııalandy. Onda jazylǵandaı, óńir boıynsha ashyq jáne jabyq ǵımarattarda saltanatty sharalar men sporttyq saıystardy ótkizýge tyıym salynǵan.
«Karaoke-barlar, bılıard zaldary, túngi klýbtar jabylady. Sondaı-aq mádenıet obektileriniń, teatrlar men kınoteatrlardyń jumysyna tyıym salyndy. Balalar oıyn-saýyq ortalyqtary men saýyqtyrý lagerleri de jumys istemeıdi. Budan bólek, jınalystardy betpe-bet ótkizýge ruqsat berilmeıdi», - delingen qujatta.
Oblysaralyq, oblysishilik, qalaaralyq jáne aýdanaralyq avtobýs, shaǵyn avtobýs jolaýshylar tasymaly toqtatylady (Pavlodar-Aqsý, Pavlodar-Kemeńger, Pavlodar-Zańǵar baǵyttaryn qospaǵanda).
«Kezekshi toptardy sanamaǵanda mektepke deıingi mekemelerdiń qyzmetine tyıym salynǵan. Demalys kúnderi azyq-túlik jármeńkesin ótkizýge bolmaıdy. Kúsheıtilgen sanıtarlyq talaptardy qatań saqtaı otyryp ashyq aýadaǵy attraktsıondardyń jumysyna ruqsat berilgen», - delingen qaýlyda.
Sonymen qatar 300 adamǵa deıingi kontıngenti bar qalalyq jáne aýyldyq mektepterde synyptaǵy balalar sanyn 25-ten asyrmaı dástúrli formatta oqytý jalǵasa bermek.
Aıta keteıik, qazirgi ýaqytta Pavlodar oblysy epıdemıologııalyq jaǵdaıdy baǵalaý matrıtsasyna sáıkes «qyzyl aımaqta» tur.
