Jańa qaýly: Nur-Sultanda qyzmetkerlerdiń 80% qashyqtan jumysqa kóshedi

NUR-SULTAN. QazAqparat – Elordada Bas memlekettik sanıtarlyq dárigerdiń «Shekteý jáne karantın sharalaryn qatańdatý týraly» jańa qaýlysy shyqty, dep habarlaıdy QazAqparat tilshisi.

Elordanyń bas sanıtary qaýlysynda menshik nysanyna jáne shtattyq sanyna qaramastan barlyq uıymdar, kásiporyndar qyzmetkerleriniń keminde 80%-y qashyqtan jumys isteýge kóshetini aıtylǵan.

Saýda nysandarynda, qyzmet kórsetý salasyndaǵy nysandarda, qoǵamdyq kólikte jáne halyq kóp jınalatyn jerlerde dezınfektsııalyq sharalar júrgizý jumystaryn kúsheıtý qajet.

Qalalyq qoǵamdyq kólik jumysyn jumys jáne senbi kúnderi saǵat 6:00-den 23:00-ge deıin jumys kestesi men jeksenbi kúnderi jumysqa tyıym salý (qarbalas ýaqytta avtobýstar sanynyń ulǵaıtý, sońǵy aıaldamada salondy dezınfektsııalyq quraldarmen óńdeý, barlyq esikterdi ashý, jolaýshylarǵa qoljetimdi oryndarda antıseptıgi bar sanıtaızerler ornatý, áleýmettik qashyqtyqty saqtaý jáne jolaýshylar men júrgizýshilerdiń maska kıýi) arqyly qamtamasyz etý qajet.

Sonymen birge, kúsheıtilgen sanıtarlyq-profılaktıkalyq sharalardy saqtaı otyryp, qalaaralyq, oblysishilik avtobýs jáne mıkroavtobýs tasymaldary jumysyn, jumys jáne demalys kúnderi dinı birlestikter nysandary (meshitter, shirkeýler, soborlar, sınagogalar jáne t.b.) jumysyn, buqaralyq is-sharalardy (juma namazy, dinı joralar jáne t. b.) ótkizýge tyıym sala otyryp jáne onda ornalasqan qoǵamdyq tamaqtaný nysandary jumysyn kúsheıtilgen sanıtarlyq-profılaktıkalyq sharalardy saqtaı otyryp uıymdastyrý kerek.

Qaýlyda offlaın keńester men otyrystar ótkizý olardy qashyqtan ótkizý múmkindigi bolmaǵan jaǵdaıda ǵana, QR Bas memlekettik sanıtarlyq dárigerdiń № 68 qosymshasyna sáıkes algorıtmdi saqtaı otyryp júrgizý jazylǵan.