Jańa qaýly: Mańǵystaýda qatań talaptardy saqtaı otyryp, toı jasaýǵa ruqsat berildi

AQTAÝ. QazAqparat - Mańǵystaýda oblystyq bas sanıtar dárigerdiń jańa qaýlysy shyqty, dep habarlaıdy QazAqparat tilshisi.

Bul týraly Mańǵystaý oblysy sanıtarııalyq-epıdemıologııalyq baqylaý departamenti basshysynyń orynbasary Asylbek Sharov aıtty.

Onyń aıtýynsha, Mańǵystaý óńiri 20 qyrkúıek kúni «jasyl» aımaqqa kirdi.

Osyǵan sáıkes, vedomstvoaralyq komıssııanyń sheshimimen aımaqta birqatar jeńildetý sharasy qolǵa alynǵan.

Oblys aýmaǵynda karantın shekteý sharalaryn jeńildetý týraly jańa qaýly 29 qyrkúıekten bastap kúshine enedi.

«Jańa qaýlyǵa baılanysty Mańǵystaýda toı uıymdastyrýǵa ruqsat. Biraq birneshe talap bar. Birinshiden, meıramhana mindetti túrde «Ashyq» jobasynyń qatysýshysy bolýy tıis. Kelýshilerdiń «Ashyq» jobasyndaǵy mártebesi «jasyl» bolýy qajet. Sondaı-aq, nysan tek 50% tolymdylyqpen jumys isteı alady. ıAǵnı, sharaǵa eń kóp degende 100 adam ǵana qatysa alady», - dedi Asylbek Sharov.

Qujatqa sáıkes, Ashyq jobasyna qatysatyn saýda oıyn-saýyq ortalyqtary, saýda úıleri men bazarlardyń qyzmetine esh shekteý joq.

«Bul nysandar ózderiniń jumys kestesine saı jumys isteıdi. Al dámhana jáne tamaqtaný obektileri 70 orynnan asyrmaı, 50% tolymdylyqpen jumys isteıdi», - dedi Asylbek Sharov.