Jańa qaýly: Almatylyq stýdentterge qoıylatyn talaptar

ALMATY. QazAqparat – Almatynyń bas sanıtar dárigeri Jandarbek Bekshın «Bilim berý mekemelerindegi koronavırýs ınfektsııasynyń taralýynyń aldyn alý jónindegi talaptar týraly» jańa qaýlyǵa qol qoıdy, dep habarlaıdy QazAqparat tilshisi.

Qaýlyǵa sáıkes, bógde adamdardyń kirýine tyıym sala otyryp, COVID-19-ǵa qarsy ekpe alǵan (18 jasqa tolmaǵan, sondaı-aq turaqty medıtsınalyq qarsy kórsetilimderi bar jáne sońǵy 3 aı ishinde COVID-19-ben aýyryp jazylǵan) stýdentterdi jataqhanaǵa ornalastyrýdy qamtamasyz etý kerek.

Sonymen qatar, oqý orny boıynsha aýmaqtyq medıtsınalyq uıymdardyń egý pýnktterinde (jyljymaly egý pýnktterin nemese kóshpeli egý brıgadalaryn qosa alǵanda) COVID-19-ǵa qarsy vaktsınatsııalaýdyń tolyq kýrsyn (ekinshi komponentpen) aıaqtamaǵan stýdentterge vaktsınatsııa júrgizýdi uıymdastyrý qajet.

Sheteldik stýdentter tómende kórsetilgen talaptar oryndalǵan jaǵdaıda kúndizgi oqý formatyna jiberiledi:

- turatyn eldiń ýákiletti organy bekitken vaktsınatsııalaý anyqtamasymen/pasportymen rastalǵan COVID-19-ǵa qarsy vaktsınatsııalaýdyń tolyq kýrsy;

- Qazaqstan Respýblıkasynyń Memlekettik shekarasynan ótkennen keıin 3 táýlikten keshiktirmeı alynǵan PTR testileýdiń teris nátıjesi.

Mektepke deıingi jáne orta bilim berý uıymdaryna, kolledjderge, joǵary oqý oryndaryna, ashanalar men býfetterge:

- respıratorlyq ınfektsııa belgileri bar adamdarǵa (jótel, murynnyń bitelýi, dene temperatýrasy 37 gradýstan joǵary);

- QR-kod boıynsha tirkeý kezinde «sary» jáne «qyzyl» mártebesi bar adamdarǵa;

- COVID-19-ǵa qarsy vaktsınatsııasy joq pedagogtar men personalǵa (turaqty medıtsınalyq qarsy kórsetilimderi bar, saýyqqannan keıin 3 aı ishinde aýyryp jazylǵan adamdardy qospaǵanda) kirýge jol berilmeıdi.

Qujattyń tolyq mátinimen myna jerden tanysýǵa bolady.