Jańa qaýly: Almatyda qoǵamdyq kólik demalys kúnderi qalaı júredi
ALMATY. QazAqparat - Almaty qalasynyń bas memlekettik sanıtar dárigeri Jandarbek Bekshınniń karantın týraly jańa qaýlysy shyqty. Qujatqa sáıkes qoǵamdyq kólikke demalys kúnderi shtattyq rejımde júrýge ruqsat berildi, dep habarlaıdy QazAqparat tilshisi.
«Bas sanıtar dárigerdiń qaýlysyna sáıkes 3 sáýirden bastap qoǵamdyq kólik demalys kúnderi 06:00 men 23:00 aralyǵynda úzdiksiz qyzmet kórsetetin bolady»,- dep habarlady «Almaty Avtobustary» kompanııasy.
Qujatqa sáıkes, saýda ortalyqtary, saýda úıleri jumys kúnderi ashyq bolady, demalys kúnderi jumys istemeıdi.
Jumys kúnderi azyq-túlik satylmaıtyn jabyq bazarlardyń da qyzmetine ruqsat berildi.
Ashyq bazarlar, sondaı-aq azyq-túlik satylatyn jabyq bazarlardyń qyzmetine jumys kúnderi men senbide ruqsat etiledi.
Qaýly búginnen bastap kúshine enedi.
Qaýlynyń tolyq mátini Almaty qalasy boıynsha sanıtarııalyq-epıdemıologııalyq baqylaý departamentiniń saıtynda jarııalanǵan.
