Jańa qaýly: Aqmola oblysynda bazarlar mereke kúnderi jumys isteıdi
KÓKShETAÝ. QazAqparat - «Aqmola oblysynyń aýmaǵynda karantındik shekteý sharalaryn odan ári kúsheıtý týraly» Bas memlekettik sanıtarlyq dárigerdiń 26 qarashadaǵy qaýlysyna birqatar ózgerister men tolyqtyrýlar engizildi. Osyǵan sáıkes, jeke turǵan azyq-túlik jáne azyq-túlik emes bazarlardyń jumysyna ruqsat etildi, dep habarlaıdy QazAqparat tilshisi.
Qaýly 16 jeltoqsan kúni saǵat 00:00 bastap kúshine enedi
Máselen, ǵımaraty bólek turǵan azyq-túlik emes dúkender jumys kúnderi saǵat 10:00-den 23:30-ge deıin, senbi kúnderi saǵat 10:00-den 20:00-ge deıin jumys isteıtin bolady. Jeksenbide jabylady. Degenmen, qurylys materıaldary men qosalqy bólshekter satatyn dúkender (saǵat 10:00-den 20:00-ge deıin), azyq-túlik sýpermarketteri, dárihana, gıpermarketter qyzmetin jeksenbide jalǵastyra beredi.
Sonymen birge, jumys kúnderi, demalys jáne mereke kúnderi balalardyń oıyn alańdary men attraktsıondardyń jumysyna tyıym salyndy.
«Azyq-túlik jáne azyq-túlik emes bazarlar (saýda úıleri, saýda ortalyqtary, pavılondar men dúkender jáne ózge de tıpti bazarlar) kelýshilerdiń sanyn 30 paıyzdan asyrmaı jáne bir kelýshige keminde 4 sh.m. saqtalǵan jaǵdaıda jumys kúnderi, senbi jáne mereke kúnderi saǵat 10:00-den 17:00-ge deıin jumys isteıtin bolady», - dep túsindirdi vedomstvodan.
Qurylys materıaldary men qosalqy bólshekter satatyn dúkenderdi (saǵat 10:00-den 17:00-ge deıin) qospaǵanda, demalys kúnderi azyq-túlik jáne azyq-túlik emes bazarlar jumysyn toqtatady.
