Jańa kassatsııalyq sottardyń tóraǵalary men sýdıalary taǵaıyndaldy
ASTANA. KAZINFORM – Kassatsııalyq sottar «jappaı kassatsııa» prıntsıpi boıynsha jumys isteı bastady.
Bıylǵy 1 shildeden bastap Astanada Memleket basshysynyń 2023 jylǵy qyrkúıekte kásipkerlermen kezdesýinde málimdegen tapsyrmasy boıynsha qylmystyq, azamattyq jáne ákimshilik ister boıynsha úsh kassatsııalyq sot óz jumysyn bastady.
Jańa sottar elordada ornalasqan.
Bıylǵy 1 shildege deıin kassatsııalyq satynyń fýnktsııalaryn Joǵarǵy Sot júzege asyrdy. Azamattyq jáne qylmystyq isterdi qaraý «tańdamaly» kassatsııalyq tártip boıynsha júrgizildi.
Onyń máni azamattyq ister boıynsha azamattardyń ótinishhattary aldymen aldyn ala qaraýǵa berilip, olardy alqaly qaraýǵa berý nemese berýden bas tartý týraly sheshimdi sýdıanyń ózi ǵana shyǵardy.
Qylmystyq ister boıynsha aldyn ala qaraý alqaly túrde, úsh sýdıanyń qatysýymen júrgizildi.
— Biraq bul tártip jetildirilmegen, azamattarǵa belgili bir qolaısyzdyq týdyrdy. Bastapqyda ákimshilik ádilettiń engizilýimen jappaı kassatsııalyq tártip qoldanylǵan ákimshilik ister boıynsha shaǵymdar túsken joq. Nátıjesinde, sot isin júrgizýdiń úsh túri boıynsha kassatsııalyq tártipte qaıta qaraýǵa basqasha kózqaras paıda boldy. Bul jaǵdaı kassatsııalyq qaraýǵa qoljetimdilikti shektedi jáne tıisinshe sot tóreligine qoljetimdilik týraly qoǵamnyń suranysyn qanaǵattandyrmady, — delingen habarlamada.
Bıylǵy jyldyń 1 shildesinen bastap qylmystyq jáne azamattyq isterdi aldyn ala qaraý joıyldy.
— Kassatsııalyq sottar «jappaı kassatsııa» prıntsıpi boıynsha jumys isteı bastady. «Jappaı» kassatsııa, eń aldymen, isti is júrgizýge qabyldaý satysymen erekshelenedi. Endi barlyq kelip túsken shaǵymdar is júrgizýge qabyldanyp, máni boıynsha keminde úsh sýdıadan turatyn alqada qaralady. Sonyń nátıjesinde sot aktilerin kassatsııalyq tártipte qaıta qaraý sottyń qalaýy boıynsha júrgizilmeıdi. Іsterdi kassatsııalyq tártipte qaraý merzimi alty aıdan aspaıdy, — delingen Joǵarǵy sot habarlamasynda.
Joǵarǵy Sot joǵary sot organy retinde sot praktıkasynyń birkelkiligin qamtamasyz etýge basa nazar aýdaratyn bolady.
Joǵarǵy Sot sýdıasynyń bastamasy boıynsha sot aktilerin qaıta qaraý, eger olardy sot praktıkasyna qaıshy keletin jergilikti jáne kassatsııalyq sottar qabyldaǵan erekshe jaǵdaılarda múmkin bolady.
Memleket basshysynyń Jarlyǵymen mynalar taǵaıyndaldy:
Azamattyq ister jónindegi kassatsııalyq sot tóraǵasy — Smaıylov Asqar Spartakuly jáne 37 sýdıa;
Qylmystyq ister jónindegi kassatsııalyq sot tóraǵasy — Jumaǵulov Aqan Maratuly jáne 20 sýdıa;
Ákimshilik ister jónindegi kassatsııalyq sot tóraǵasy — Nájimıdenov Berik Tóleýtaıuly jáne 18 sýdıa.
Sot ákimshiligi basshysynyń Ókimimen:
Kassatsııalyq sottar departamentiniń basshysy bolyp Qojahmetov Erjan Qaırollauly taǵaıyndaldy.
Astana qalasyndaǵy kassatsııalyq sottardyń mekenjaılary:
Azamattyq jáne qylmystyq ister boıynsha — Astana qalasy, Beıbitshilik kóshesi, 37;
Ákimshilik ister boıynsha — Astana qalasy, Tóle bı kóshesi, 53
Aıta ketelik Memleket basshysy Qasym-Jomart Toqaev Qazaqstan Respýblıkasy Kassatsııalyq sottarynyń tóraǵalary men sýdıalaryn taǵaıyndaý týraly Jarlyqqa qol qoıǵan edi.