Jańa Kaledonııadaǵy tártipsizdikter - jandarmdar áýejaıdan shyǵatyn joldy jaýyp tastady

ASTANA. KAZINFORM – Frantsııanyń ortalyq bıligi dúısenbide qaýipsizdik kúshteri áýejaı men Frantsııanyń Tynyq muhıty aımaǵynyń astanasy Nýmea arasyndaǵy joldy buǵattaǵanyn habarlady. Alaıda tártipsizdikter áli basylmaı tur, dep jazady VVS.

Jańa Kaledonııanyń Joǵarǵy komıssııasy jandarmdardyń 40 shaqyrymdyq jol boıyndaǵy 76 tosqaýyl men úıindilerdi tazalaǵanyn jáne aldaǵy kúnderi joldyń, sonyń ishinde órtengen kólikterden tolyq tazartylatynyn habarlady.

Bılik áýejaıdyń kommertsııalyq reısterge qashan ashylatynyn ázirge aıtqan joq.

Qashan tolyq tynyshtyq ornaıtyny belgisiz. El astanasy Nýmea meri Sonıa Lagard demalys kúnderi jýrnalısterge Jańa Kaledonııanyń «qorshaýda» ekenin aıtty.

Onyń sózinshe, búlikshiler arhıpelag boıynsha kóptegen qoǵamdyq ǵımarattardy órtep, júzdegen frantsýz polıtsııasy Jańa Kaledonııaǵa jiberilgenine qaramastan, jaǵdaı turaqsyz bolyp tur.

Esterińizge sala keteıik, Frantsııaǵa baǵynatyn Jańa Kaledonııanyń Tynyq muhıty aımaǵynda jappaı tolqýlar bastaldy. Elde tótenshe jaǵdaı jarııalandy.