«Jańa qala» jobasyn júzege asyrýǵa kásipkerler de óz úlesin qosady - Qyzylorda
QYZYLORDA. QazAqparat - Qyzylorda qalasynyń basshysymen bolǵan kezdesýde aımaq kásipkerlerine Qyzylorda qalasynyń sol jaǵalaýyn damytý maqsatynda qolǵa alynǵan «Jańa qala» jobasy tanystyryldy, dep habarlaıdy QazAqparat tilshisi.
Aıta ketý kerek, oblys ákimi Qyrymbek Kósherbaevtyń bastamasymen Syrdarııa ózeniniń sol jaǵalaýyndaǵy 1532 gektar aýmaqtyń túbegeıli josparlaý jobasy jasalyp, búginde alǵashqy qurylystar bastalyp ketti.
Bul aýmaqta 3 mıllıon sharshy metrden astam turǵyn úı, 190 myń sharshy metr saýda, keńse ǵımarattary, 16 mektep, 12 balabaqsha, 4 densaýlyq nysany jáne basqa da kóptegen kásipkerlik nysandar irge kóteredi dep josparlanýda.
Sol jaǵalaýdy keshendi ıgerýdiń 1-shi kezeńi - sol jaǵalaý alańynyń jáne qajetti ınfraqurylymdarynyń qurylysy 2017-2024 jyldar aralyǵynda josparlansa, alǵashqy qadamy retinde byltyrǵy jyly Syrdarııa ózeniniń eki jaǵalaýyn baılanystyratyn joba quny 6 mlrd teńge quraıtyn avtomobıl kópiri paıdalanýǵa berildi.
Bıyl Syrdarııa ózeniniń sol jaǵalaýynan 5 qabatty 18 turǵyn úıdiń jáne 320 oryndyq balabaqshanyń irgetasy qalanyp, qazirgi tańda qurylys jumystary júrgizilýde. Paıdalanýǵa tapsyrý merzimi 2018 jyldyń birinshi jarty jyldyǵy bolyp belgilendi. Eń bastysy, bul nysandar qurylys kompanııalarynyń óz qarajaty esebinen salynýda.
Sonymen qatar, atalǵan aýmaqta «Qazaq ortalyq atqarý komıteti» murajaıy, «Jastarǵa qyzmet kórsetý» ortalyǵy, «Bolashaq» ýnıversıtetiniń stýdentter qalashyǵynyń ǵımarattary boı kóterýde.
Sharada, qala basshysy kásipkerlerdi sol jaǵalaýdy ıgerý sharalaryna belsendi qatysýǵa shaqyrdy. Ol úshin tıisti ákimshilik qoldaý kórsetýge ázir ekendigin jetkizdi.
«Sol jaǵalaýdy ıgerýde barlyq usynystaryńyzdy qaraýǵa ázirmiz. Ákimshilik tarapynan qajetti jaǵdaıdy jasaýǵa daıynbyz. Ázirge jerdi ýaqytsha paıdalanýǵa berip jatyrmyz. Bir jyldyń ishinde qurylys jumystary júrip, jumys bastalyp ketse ári qaraı kásipkerlerge zańdastyryp beremiz. Bizdiń maqsat mlrd teńgeden astam qarjyny talap etetin iri jobalardy salý ǵana emes. Eger shaǵyn jobalaryńyz bolsa ony qarastyraıyq. Kelińizder! Belsendilik tanytyńyzdar», - dedi qala ákimi Nurlybek Nálibaev.
Aıta ketý kerek, sol jaǵalaýda ıgerýde Kásipkerler palatasy da óz kezeginde jan-jaqty qoldaý kórsetýge ázir. Ol úshin bıznes-josparlardy, ózge de qujattardy tegin ázirlep berýge daıyn.
