Jańa qala: Soltústik Qazaqstandaǵy nysandar jańartylady
NUR-SULTAN. QazAqparat – Soltústik Qazaqstan oblysynda baspana qurylysyn bıýdjettik qarjylandyrý kólemi 1,5 ese artty. Bul týraly SQO ákimi Qumar Aqsaqalov aıtyp berdi, dep habarlaıdy QazAqparat tilshisi.
«Jyl sońyna deıin aımaqta 300 myń sharshy metr baspana qoldanysqa beriledi. Úsh jyl buryn budan 1,5 ese azyraq úı salatyn edik. Kelesi jyldary bul kórsetkishti 400 myń sharshy metrden túsirmeýdi josparlap otyrmyz», - dedi ákim Ortalyq kommýnıkatsııalar qyzmetinde ótken brıfıngte.
Onyń aıtýynsha, Petropavlda 32 kóppáterli úı salynyp jatyr. Onyń 14-i jeke ınvestıtsııalar esebinen turǵyzylady.
Onyń basym bóligi úsh jyl ishinde buzylǵan 1 277 eski úıdiń ornyna salyndy. Jumys aýqymyn arttyrý úshin óńirde «Jańa qala» renovatsııa baǵdarlamasy qabyldanǵan.
«Áleýmettik nysandardyń qasbeti jańarady. Ótken jyly elimizdegi barlyq jóndelgen mektepterdiń 40% bizdiń óńirge tıesili boldy. Bıyl da bul jumysty jalǵastyrdyq. Byltyr jańartylǵan 142 mektepke qosymsha bıyl taǵy 107 nysan jóndeýden ótti. Osylaısha, eki jyl ishinde oblystyń barlyq mektepteriniń jartysy kúrdeli jóndeýden ótti», - dedi Q.Aqsaqalov.
Kelesi jyly áskerı ınstıtýttyń jańa oqý korpýsy salynady. Bul 660 kýrsant úshin bilim berý protsesin jaqsartýǵa múmkindik beredi.
«Densaýlyq saqtaý salasyndaǵy eń iri joba – kópsalaly aýrýhananyń qurylysy jalǵasýda. Elordany eseptemegende, bul JCI standarttaryna sáıkes keletin Qazaqstandaǵy alǵashqy aýrýhana bolady», - dedi Q.Aqsaqalov.
