Jańa qala: Petropavlda renovatsııalyq baǵdarlama aıasynda shaǵynaýdandar jańaryp jatyr

PETROPAVL. QazAqparat – Petropavlda «Jańa qala» renovatsııalyq baǵdaramasy aıasynda jeke sektordaǵy eski úıler syrylyp, ornyna jańa, kópqabatty ǵımarattar boı túzep jatyr, dep habarlaıdy QazAqparat tilshisi.

Soltústik Qazaqstan oblysynyń ákimi Qumar Aqsaqalov áleýmettik jelidegi paraqshasynda Petropavldaǵy oń ózgeristi kórsetetin beınerolıkti jarııalady.

2017 jyly oblys ortalyǵyna kire beriste negizinen jekemenshik, jartylaı jerge kirgen eski úıler tursa, 4 jyldyń ishinde qalanyń bul aýdany tanymastaı ózgerdi.

«4 jyldyń ishinde oblys ortalyǵynda jańa «Jas Órken» yqsham aýdany boı kóterdi. Zamanaýı qalanyń basty talaptaryna saı keletin aýdandy jınaqy qylyp salyp jatyrmyz. Mysaly, «Jas Órkende» 200-den astam eski jeke úılerdiń ornyna 2400 páter salynyp, boı kóterip jatyr», - deıdi Qumar Aqsaqalov.

Bul ózgeristiń eń aldymen qalalyqtarǵa paıdasy zor. ⠀

«Birinshiden, jeke sektor turǵyndary jaıly páterlerge ıe boldy. Ekinshiden, qaladaǵy jaqsy aýdannan turǵyn úı satyp alý múmkindigi kóbeıdi. Úshinshiden, qalaǵa astanamyz jaǵynan kireberis ózgerip jatyr.

Tozyǵy jetken jeke úılerdiń ornyna Jambyl, Gorkıı jáne Park kósheleriniń boıynda záýlim úıler boı kóterýde. Jańa mektep salyndy, kóp qabatty úılerdiń birinshi qabattarynda 2 shaǵyn ortalyq ashyldy. Qol sozym jerde Oqýshylar saraıy, tennıs ortalyǵy men sport saraıy ornalasqan. Park kóshesinde jańa emhananyń qurylysyn bastaımyz. Bir sózben aıtqanda, «Jańa qala» renovatsııa baǵdarlamasy aıasynda bul yqsham aýdannyń qurylysy jalǵasady», - deıdi SQO ákimi Qumar Aqsaqalov.