Jańa ıpotekalyq baǵdarlamany qarjylandyrýǵa qarajat qaralmaǵan - mınıstrlik

ASTANA. QazAqparat – Jańa baspana alýǵa ıpoteka boıynsha syıaqy mólsherlemesiniń bir bóligin sýbsıdııalaý tetigine bıýdjetten qarajat qarastyrylmady. Bul týraly Indýstrııa jáne ınfraqurylymdyq damý vıtse-mınıstri Erkebulan Daýylbaev aıtty, dep habarlaıdy QazAqparat tilshisi.

«Atalǵan sýbsıdııalaý tetigi qarastyrylǵan. Biraq qazirgi tańda qarajattyń shekteýligine baılanysty, kelesi jylǵa ótinim berdik. Ol ótinim Qarjy mınıstrligi tarapynan qoldaý tappady. Bul másele qarajatqa tirelip tur. Atap aıtqanda, ekinshi deńgeıli bankten ıpoteka alǵan jaǵdaıda, sonyń 7 paıyzyn memleket tarapynan jabý maqsatynda, sondaı-aq ıpotekanyń tartymdylyǵyn arttyrý úshin osyndaı tetikti qarastyrǵan bolatynbyz. Degenmen kelesi jylǵa bul tetik boıynsha qarjy qarastyrylǵan joq», - dedi E. Daýylbaev Senattaǵy Úkimet otyrysynan keıin tilshiler suraǵyna jaýap bere otyryp.

Sonymen qatar ol qarjy tabylsa, atalǵan sýbsıdııalaý tetitigi «7-20-25» baǵdarlamasymen qatar júretinin naqtylady.

Eske salsaq, bıyl shilde aıynda «Báıterek» ulttyq basqarý holdınginiń basqarma tóraǵasy Qanat Shalapaev ıpotekanyń jańa túri iske qosylýy múmkin ekenin aıtqan edi.

Osy oraıda ekinshi deńgeıli bankterdiń naryqtyq ıpotekasy boıynsha syıaqy mólsherlemesin sýbsıdııalaý tetigin iske qosý usynyldy.

Budan buryn habarlanǵandaı, elimizde «7-20-25» baǵdarlamasy jalǵasady.