Jańa iPhone shyqqan soń Apple-dyń naryqtaǵy quny taǵy da 1 trln dollardan asty
NUR-SULTAN. QazAqparat – Sársenbi kúni 11-shi býynnyń iPhone-yn tanystyrǵannan keıin Apple-diń naryqtaǵy quny 1 trıllıon dollardan asty, dep habarlaıdy QazAqparat cnbc.com-ǵa silteme jasap.
Sársenbi kúni bırja saýdalary jabylardyń aldynda Apple aktsııalarynyń quny 2% ósip, 223,59 dollarǵa jetti.
Apple bul mejege byltyr tamyz aıynda da jetken bolatyn. Biraq Qytaıda Apple ónimderi oıdaǵydaı satylmaýyna baılanysty, jeltoqsan-qańtar aılarynda aktsııalarynyń quny azaıǵan ári Apple mıllıondaǵan aktsııasyn ózi satyp alǵan.
Aıta keteıik, Apple naryqtaǵy quny 1 trıllıon dollardan asatyn álemdegi jalǵyz tehnologııalyq kompanııa emes. Microsoft korporatsııasynyń da naryqtaǵy quny 1,04 trıllıon dollarǵa baǵalanady.
Seısenbi kúni Apple iPhone, Apple Watch jáne iPad-tyń jańa modelderi tanystyryldy, sondaı-aq iPhone 11-diń baǵasy bastapqy qun retinde 50 dollarǵa azaıtyldy.
