Jańa iPhone Air smartfony Qytaıda birneshe mınýt ishinde satylyp ketti

ASTANA. KAZINFORM — Apple kompanııasynyń jańa iPhone Air smartfony Qytaıda satylym bastalǵannan keıin nebári birneshe mınýt ishinde tolyqtaı satyldy, dep habarlaıdy South China Morning Post.

eSIM tehnologııasyn qoldaıtyn bul modelge Qytaıda aldyn ala tapsyrys berý álemniń basqa elderinen bir aıdan kesh bastaldy. Bul qurylǵy jaqynda ǵana Qytaıdyń arnaıy ruqsatyn alǵan. Alaıda ótken juma kúni satylym ashylǵan sátten bastap-aq qurylǵy onlaın-dúkender men bólshek saýda jelilerinen áp-sátte joǵalyp ketti.

Apple-diń eń juqa smartfonyna degen joǵary suranys qytaılyq tutynýshylardyń amerıkalyq brendke degen qyzyǵýshylyǵy áli de joǵary ekenin kórsetedi. Bul — Huawei men Xiaomi syndy jergilikti óndirýshiler tarapynan básekelestik kúsheıip jatqanyna qaramastan baıqalyp otyr.

2025 jyldyń úshinshi toqsanynda Qytaıdyń smartfon naryǵy bir jylda 3 paıyzǵa qysqarǵan. Satylym boıynsha kóshbasshy — Vivo kompanııasy (18%), odan keıin Huawei (16%) jáne Apple (15%) bolǵan. Odan keıingi oryndarda Xiaomi men Oppo tur.

Bul qarqyndy satylymdar Apple bas dırektory Tım Kýktyń Qytaıǵa saparynan keıin bastaldy. Ol álemdegi eń iri smartfon naryǵynda jańa ónimdi tanystyryp, QHR Saýda mınıstri Van Ventaomen kezdesip, ekijaqty ekonomıkalyq qarym-qatynasty damytý máselelerin talqylady. Kýk Apple-diń Qytaımen yntymaqtastyqty nyǵaıtýǵa nıetti ekenin atap ótti.

Aıta keteıik, buǵan deıin Qytaıda eSIM telefon qyzmetteri el boıynsha iske qosylǵany habarlanǵan bolatyn.