Jańa ınvestıtsııalyq jobalar iske asyrylyp jatqan óńirler ataldy

NUR-SULTAN. QazAqparat – 2021-2025 jyldar kezeńinde qurylys materıaldary salasynda 1 trln 66 mlrd teńgege 165 joba iske asyrylmaq. Bul týraly QR Indýstrııa jáne ınfraqurylymdyq damý mınıstri Beıbit Atamqulov málim etti, dep habarlaıdy QazAqparat tilshisi.

«Paıdalanýǵa berilip jatqan jańa turǵyn úılerdiń kóbeıgenin eskersek, jumys istep turǵan kásiporyndardyń qýatyn arttyryp, jańa serpindi ınvestıtsııalyq jobalardy iske asyrý qajet. Bul salanyń ımportqa táýeldiligin azaıtady. 2021-2025 jyldar kezeńinde jalpy somasy 1 trln 66 mlrd teńgege 165 jobany iske asyryp, 16,3 myń jańa jumys ornyn ashý boljanyp otyr. Óńirlerge qatysty alsaq, eń kóp jańa ınvestıtsııalyq jobalardy Aqmola (21 joba), Túrkistan (21 joba), Almaty (19 joba) oblystary men Nur-Sultan (26 joba) jáne Shymkent (16 joba) qalalarynda iske qosý josparlanýda», - dedi B. Atamqulov Úkimet otyrysynda.

Bıyl qurylys materıaldary óndirisinde 2 iri joba iske qosyldy:

Birinshi joba. Aqtóbe oblysynda Zerde-Keramıka kásipornyn keńeıtý aıasynda jobalyq qýaty 5 mln sharshy metr bolatyn zaýyt iske qosyldy. Bul eldegi keramıka plıta óndirisi qýatyn 3 esege (2,5 mln sharshy metrden 7 mln sharshy metrge deıin) arttyrdy.

Ekinshi joba. Bıyldyń 8 jeltoqsanynda «Orda Glass» jaýapkershiligi shekteýli seriktestiginiń tabaq shyny quıýǵa arnalǵan kásiporny iske qosyldy. Tehnıkalyq erekshelikterge sáıkes, zaýyt alǵashqy ónimin kelesi jyldyń sáýir aıynda naryqqa shyǵarýdy josparlanyp otyr.

Budan buryn habarlanǵandaı, jalpy qurylys materıaldarynyń ishki naryǵy 2,6 mlrd AQSh dollaryn quraıdy (2021 jyldyń 11 aıynyń qorytyndysy boıynsha). Onyń ishinde otandyq óndiris úlesi - 60% ($1,6 mlrd), ımport - 40%) ($1 mlrd).