Jańa ınvestıtsııalyq saıasatty júzege asyrý úshin Úkimettik jáne óńirlik keńester qurylady
ASTANA. QazAqparat Jańa ınvestıtsııalyq saıasatty júzege asyrý úshin 2016 jyly Úkimettik jáne óńirlik keńester qurylady. Bul týraly búgin Parlament Májilisindegi Daǵdarysqa qarsy sharalarǵa arnalǵan Úkimet saǵatynda QR Ulttyq ekonomıka mınıstri Erbolat Dosaev málim etti.
«Daǵdarysqa qarsy sharalardyń tórtinshi baǵyty jańa ınvestıtsııalyq saıasat. Bul rette el ekonomıkasyna ınvestıtsııa tartýdy yntalandyrý úshin 2016 jyldyń birinshi toqsanynda Úkimettiń Naqty is-qımyl jospary qabyldanatyn bolady. Onda Ekonomıkalyq yntymaqtastyq jáne damý uıymynyń standarttaryna sáıkes, ınvestıtsııalyq klımatty jaqsartý jónindegi sharalar tolyq qamtylady. Budan bólek, osy jumystardy uıymdastyrý úshin 2016 jyldyń qańtarynda Úkimettik jáne óńirlik keńester qurylady», dedi Erbolat Dosaev.
Mınıstrdiń aıtýynsha, 2016 jyldyń shilde aıyna deıin elimizdiń alty makroóńirinde (Ońtústik, Soltústik, Ortalyq Qazaqstan, Batys, Almaty jáne Astana) ınvestıtsııalyq damý baǵdarlamalary ázirlenedi.
«2016 jyldyń naýryz aıyna deıin úkimettik qaryzdar deńgeıin tómendetý boıynsha bıýdjettik zańnamaǵa ózgerister engiziledi», dedi E. Dosaev.
