Jańa ıdeıalar men serpindi jobalar erkin qoǵamda ǵana júzege asady - Prezıdent

ASTANA. QazAqparat – Jańa ıdeıalar men serpindi jobalar erkin jáne úılesimdi qoǵamda ǵana júzege asady. Mundaı pikirdi QR Prezıdenti Qasym-Jomart Toqaev bildirdi, dep habarlaıdy QazAqparat tilshisi.

«Jańa ıdeıalar men serpindi jobalar tek erkin jáne úılesimdi qoǵamda ǵana júzege asatynyna senimdimin. Sondyqtan da elimizdi aýqymdy jańǵyrtý aıasynda biz Ádiletti Qazaqstan – barlyǵy úshin teńdeı múmkindikter memleketin qurýǵa nıettimiz», - dedi Memleket basshysy «Digital Bridge 2022» halyqaralyq tehnologııalyq forýmy barysynda.

Onyń aıtýynsha, aqparattyq órkenıettiń damýy nátıjesinde tsıfrlyq kóshpendiler sııaqty qubylys paıda bolǵan.

«Qazirgi dıdjıtal-nomadtar jahandyq kıber jáne fızıkalyq keńistikti belsendi ıgerip, jańa ónimder men naryqtardy quryp jatyr. Búgingi forýmdaǵy nátıjeli pikir almasý aımaqtyń tsıfrly bolashaǵynyń baǵdaryn aıqyndaýǵa, Eýrazııa keńistiginde jańa serpindi bastamalardy júzege asyrýdyń negizin qalaýǵa múmkindik beretinine senimdimin», – dedi Qasym-Jomart Toqaev.

Foto: t.me/bort_01