Jańa hattama: bógde ǵalamshardan belgi kelse, aldymen ne isteý kerek
ASTANA. KAZINFORM – Halyqaralyq astronavtıka akademııasy (IAA) 2010 jyldan beri alǵash ret SETI baǵdarlamasynyń yqtımal bógde ǵalamshar órkenıetiniń belgileri anyqtalǵan jaǵdaıda qoldanylatyn is-qımyl hattamalaryn jańartty. Bul týraly atalǵan akademııanyń saıtynda habarlandy.
Ózgerister dıpfeıkterdiń, jalǵan aqparattyń jáne rastalmaǵan málimdemelerdiń kóbeıýine baılanysty engizildi. IAA saıtynda jarııalanǵan qujatqa sáıkes, ǵalymdar anyqtalǵan sıgnal nemese ózge de nysan táýelsiz tekserýden ótpeıinshe, yqtımal baılanys týraly jarııa málimdeme jasamaýǵa tıis.
Jańa erejege sáıkes, mundaı málimetti basqa zertteý toptary ózderiniń jeke jabdyqtaryn paıdalanyp rastaýy jáne qosymsha ózge observatorııada tekserýi qajet. Sonymen qatar bastapqy ǵylymı derekterdiń barlyǵy ǵylymı qaýymdastyqqa taldaý jasap, saraptamadan ótkizý úshin usynylýy qajet.
Jańartylǵan hattamalar yqtımal bógde órkenıetke jaýap berý tártibin de ózgertedi. Budan bylaı jekelegen zertteýshiler óz betinshe habarlama jiberý týraly sheshim qabyldaı almaıdy. Mundaı másele BUU aıasynda halyqaralyq deńgeıde talqylanyp, búkil adamzattyń atynan qabyldanatyn sheshim retinde qarastyrylýy kerek.
Qujat avtorlary ǵalymdardy asyǵys sensatsııalyq qorytyndy jasaýdan bas tartýǵa shaqyryp, astronom Karl Sagannyń «erekshe málimdemeler erekshe dálelderdi talap etedi» degen qaǵıdatyn ustanýǵa úndedi.
Sarapshylardyń pikirinshe, hattamalardy jańartý rastalmaǵan ǵylymı derekterge baılanysty jalǵan aqparat pen negizsiz sensatsııalardyń taralý qaýpin azaıtýǵa múmkindik beredi.
Aıta keteıik, NASA orbıtalyq teleskopty Jerge qulaýdan qutqarý úshin robot ushyratyn boldy.
Al astronomdar «tym úlpildek» ǵalamsharlardy anyqtady.
