Jańa halyqaralyq kelisimder Qazaqstannyń ınnovatsııalyq áleýetin arttyrady
ASTANA. KAZINFORM — 6 qarashada memleket basshysy Q. Toqaev Vashıngtonǵa resmı saparmen bardy. «C5+1» formatynda AQSh jáne Orta Azııa elderimen kezdesip, ekonomıkalyq yntymaqtastyq pen ınvestıtsııalyq jobalardy talqylady, birneshe iri kelisimge qol qoıdy. Kazinform tilshisi osy taqyrypty QR SІM janyndaǵy Syrtqy saıası zertteýler ınstıtýtynyń sarapshysy Nurjan Ómirbekpen taldaýǵa tyrysty.
Sarapshynyń aıtýynsha, Qazaqstan tsıfrlyq tehnologııalardy ekonomıkany ártaraptandyrý jáne jańa sapaly ósimge jeteleıtin negizgi qural retinde qarastyrady.
— JI ekonomıkalyq táýelsizdikti nyǵaıtý, memlekettik basqarýdy jetildirý jáne óndiristik tıimdilikti arttyrý úshin mańyzdy. Qazirgi jahandyq úrdiste tsıfrlyq transformatsııa arqyly básekege qabiletti bolýdy kózdep otyrǵan memleketter kóp. Sondyqtan Qazaqstan iri halyqaralyq seriktestermen birge tsıfrlyq ınfraqurylymdy jańǵyrtýǵa, aqparattyq derekter ortalyqtaryn damytýǵa jáne jasandy ıntellekt salasynda óńirlik habqa aınalýǵa umtylyp otyr. Bul baǵyt bilimge, ınnovatsııaǵa jáne adamı kapıtalǵa negizdelgen ekonomıka qalyptastyrýmen tikeleı baılanysty, — dedi sarapshy.
OpenAI, NVIDIA sııaqty kompanııalarymen jasalǵan kelisimder Qazaqstandaǵy JI ındýstrııasyn damytýdy jedeldetedi.
— OpenAI álemdegi jetekshi zertteý ortalyqtarynyń biri bolsa, NVIDIA grafıkalyq protsessorlar men chıp óndirýde kóshbasshy. Bul seriktestik Qazaqstanǵa ozyq algorıtmderdi engizýge, JI negizdelgen tildik modelderdi damytýǵa múmkindik beredi. Nátıjesinde qýatty esepteý ortalyqtaryn qurýǵa bolady. Mundaı seriktestikter Qazaqstandy tehnologııalyq ımporttaýshy memleketten jańa ınnovatsııalar oılap tabatyn elge aınaldyrady. Árıne, kadrlyq áleýetti kúsheıtý jáne normatıvtik bazany jetildirý qajet, — dep atap ótti sarapshy.
Boeing kompanııasymen jasalǵan kelisimder de strategııalyq mańyzy bar.
— Boeing-pen seriktestik avıatsııalyq salany damytýǵa úles qosady. Bul tek ushaq parkiniń jańartylýymen shektelmeı, ınjenerlik jáne tehnıkalyq qyzmet kórsetý, kadr daıarlaý máselelerin qamtıdy. Sondaı-aq avıa ınfraqurylymyn jańǵyrtyp, tranzıttik áleýetimizdi arttyrýǵa múmkindik beredi, — dedi Nurjan Ómirbek.
Amerıkalyq ýnıversıtettermen birlesken bilim berý baǵdarlamalary Qazaqstandaǵy kadr daıarlaýǵa aıtarlyqtaı yqpal etedi.
— Bilim berý salasyndaǵy seriktestik eldiń uzaq merzimdi damý strategııasynyń negizgi elementi. Mundaı baǵdarlamalar halyqaralyq standarttar men zertteý mádenıetterine negizdelgen jańa býyn mamandaryn daıarlaýǵa kómektesedi. Ásirese AI Engineering jáne jasandy ıntellekt salasyndaǵy jańa mamandyqtardy meńgerý, durys saýaldar qoıý sııaqty daǵdylarǵa úıretedi. Bul Qazaqstandy jahandyq tehnologııalyq protsesterdiń belsendi qatysýshysyna aınaldyrady, — dedi sarapshy.
Buǵan deıin Qazaqstan delegatsııasynyń AQSh-qa sapary barysynda qandaı kelisimder jasalǵanyn jazǵanbyz.