Jańa Gvıneıada sıqyrmen aınalysqan degen kúdikpen áıeldi tirideı órtep jiberdi
ASTANA. 8 aqpan. QazAqparat - Balanyń týystary «Ulymyzdyń qanyn moınyna júktegisi keldi» dep, 20 jastaǵy Keparı Lenıatany aıyptap qana qoımaı, ony sheshindirip, jippen baılap-matap, ústine janar-jaǵarmaı quıyp, dúıim jurttyń kózinshe otqa tastady. Bul jaıynda National basylymy habar taratty.
Courier basylymynyń habaryna qaraǵanda, polıtsııa men órt sóndirýshiler joldaryn kes-kestegen tobyrdyń kesirinen áıeldi azapty ólimnen arashalap alyp qalýǵa dármensizdik tanytqan kórinedi. Bul jaıynda habar taratqan eki basylym da Maýnt-Hagen qalasynda bolǵan qaıǵyly oqıǵany fotosýretke túsirip, gazetke jarııalady.
muslim.kz saıtynyń jazýynsha, jergilikti polıtsııanyń basshysy, podpolkovnık Kaıglo Ambane osy oqıǵaǵa qatysty is qozǵalyp, kinálilerdiń tutqyndalatynyn málimdedi.
Papýa-Jańa Gvıneıanyń túkpirdegi provıntsııalarynda ólim aýzynda jatqandar men aýrýy anyqtalmaǵan adamdardy «sıqyrshy» dep aıyptaıtyn ádet áli kúnge qalmaǵan. Sońǵy jyldary sıqyrmen aınalysty dep aıyptalǵan adamdardy osy áıel sekildi óltirgeni jaıly birneshe habar jaryq kórgen bolatyn.
Birneshe ret qaıtalanǵan osyndaı qaıǵyly oqıǵalardan soń 2009 jyly Konstıtýtsııalyq jáne zańnamalyq reforma jónindegi komıssııanyń tóraǵasy kisi ólimine kináli jaqtyń «sıqyrmen aınalysty degen» aıypty jeleý etetinin aıtyp, olarǵa qoldanylatyn jazany kúsheıtýdi suraǵan bolatyn.
Epıskop Devıd Pızo National gazetine bergen suhbatynda sıqyrmen aınalysty degen aıypty jeleý etip, kisi óltirý faktisiniń jıilep ketkenine alańdap, el bıligin osynaý jat, jabaıy ádetti toqtatýǵa shaqyrǵan edi.
Osy eldegi AQSh elshiligi de mundaı taǵylyqty aıyptap, genderlik zorlyq-zombylyqtyń keńinen taraǵanyna qynjylys bildirgen. Bul jaıynda Frans press agenttigi habar taratqan bolatyn.
«Mundaı zorlyq-zombylyqty aqtaýdyń esh reti joq. Keparı Lenıatanyń ólimine kinálilerdi anyqtap, tıisti jazasyn berýge qarajat bólinedi dep senemiz», - dep aıtylǵan elshiliktiń málimdemesinde.
