Jańa GSM-operatory baılanys salasy naryǵynda básekelestikti damytýǵa kúshti serpin beredi - A. Jumaǵalıev
ASTANA. QazAqparat - «Altel» AQ-nyń abonentteri daýystyq baılanys pen 4G joǵary jyldamdyqtaǵy ınternetti bir mezgilde qoldana alady. Bul týraly «Altel» AQ-men usynylǵan jańa GSM-operatorynyń kommertsııalyq qoldanysqa berilýine arnalǵan saltanatty shara barysynda aıtyldy.
«Altel» AQ-nyń abonentteri daýystyq baılanys pen 4G joǵary jyldamdyqtaǵy ınternetti bir mezgilde qoldana alady, sebebi bul 2G/3G/4G tehnologııalaryn bir mezgilde qoldaıtyn elimizdegi alǵashqy konvergentti jeli. Bul jeli Astana, Almaty qalalarymen qatar, Qazaqstannyń alty oblys ortalyǵynda - Qaraǵandy, Aqtóbe, Atyraý, Aqtaý, Shymkent jáne Óskemende iske qosyldy. Aǵymdaǵy jyldyń qyrkúıeginde «Altel»AQ-y Taraz, Kókshetaý, Qostanaı, Qyzylorda, Petropavl, Taldyqorǵan jáne Oral qalalaryn atalǵan jelimen qamtamasyz etýdi kózdep otyr», - delingen QR Baılanys jáne aqparat agenttigi baspasóz qyzmetiniń málimetinde.
2014 jyldyń sońynda turǵyndar sany 50 000 nan asatyn elimizdiń barlyq qalasyndy LTE/UMTS/GSM tehnologııalarynyń bazasyndaǵy baılanys qoljetimdi bolady dep kútilýde.
Tanystyrylym barysynda QR Baılanys jáne aqparat agenttiginiń tóraǵasy Asqar Jumaǵalıevtiń atap ótýinshe, jańa GSM-operatorynyń paıda bolýy baılanys salasynyń naryǵynda básekelestikti damytýǵa kúshti serpin bermek, bul óz kezeginde qyzmet sapasynyń artýy men tarıfterdiń tómendeýine yqpal etedi.
«Altel» AQ - «Qazaqtelekom» AQ-nyń enshiles kompanııasy, 1994 jyldan beri respýblıka aýmaǵynda mobıldi baılanys qyzmetin usynyp keledi. Osydan 20 jyl buryn kompanııa uıaly baılanys qyzmetin qazaqstandyqtarǵa birinshi bolyp usyndy, keıin EVDO (3G) standartyn alǵashqylardyń biri bolyp engizdi.
Aıta keteıik, Qazaqstannyń uıaly baılanys naryǵynda búgingi kúnge deıin úsh GSM-operatorlary («Ksell»AQ, «KaR-Tel» jáne «Mobaıl Telekom-Servıs»JShS) óz qyzmetterin usynyp keldi. Endi olardyń qataryna «Altel» AQ-nyń osyndaı baılanysy iske qosyldy.
