Jańa fýnktsııa: ChatGPT onlaın-shopıng pen prezentatsııa jasaýy múmkin
ASTANA. KAZINFORM — ChatGPT endi ınternet-dúkennen satyp alýdy júzege asyra alady jáne PowerPoint prezentatsııalaryn jasaıdy, dep habarlaıdy AZERTADJ.
OpenAI kompanııasy ChatGPT platformasyna onlaın-shopıng jáne prezentatsııa jobalaryn jasaý múmkindigin beretin jańa fýnktsııa — ChatGPT Agent-ti iske qosty.
Jańa qural qazirgi ýaqytta Pro, Plus jáne Team jazylýshylaryna qoljetimdi. Kompanııa aldaǵy jazda korporatıvtik jáne bilim berý tutynýshylaryna da ashýdy josparlap otyr.
ChatGPT Agent ınternetti qaraýǵa, mátin terýge, siltemelerdi ashýǵa jáne tolyqqandy onlaın zertteýler júrgizýge múmkindik beredi. Bul qyzmet OpenAI-diń burynǵy kezeńdegi Operator men Deep Research quraldary múmkindikterin biriktiredi.
Qaýipsizdik maqsatynda qural keıbir áreketterge shekteýler qoıady: mysaly, qarjylyq nemese zańdyq tapsyrmalardy oryndamaıdy. Sonymen qatar satyp alý aldynda paıdalanýshynyń ruqsatyn talap etedi.
Buǵan deıin Qazaqstanda ulttyq standart jobalaryn saraptaý úderisine jasandy ıntellektini qoldaný josparlanyp otyrǵany habarlandy.