Jańa fılm: «Bir kem dúnıeni» kórińiz
ASTANA. 13 aqpan. QazAqparat - Qazaq kınosy taǵy bir jańa rýhanı týyndymen tolyqty.
Jaqynda jurtshylyqtyń nazaryna jańa fılm - «Bir kem dúnıe» jol tartatyn bolady.
Fılmniń prodıýseri ári stsenarıin jazǵan belgili jýrnalıst Orynbasar Baltabaıuly, al qoıýshy rejısseri Tólegen Beıset. Basty rólderde QR eńbek sińirgen qaıratkerleri Orazhan Sádýaqasuly, Sholpan Sirgebaeva, belgili akterler Azamat Satybaldy, Jalǵas Tolǵanbaı jáne t.b. oınaıdy.
Fılmde qarapaıym aýyl aqsaqalynyń ómiri baıandalady. Eshkimmen qaq-soǵy joq Musa aqsaqaldyń ómirlik ustynymy adal aqsha tabý. Tapsyryspen at ábzelderin jasaıdy. Qudaı qosqan qosaǵy Nurjibek te úı sharýalarymen áýre bolsa, bala men kelini qalada jumys isteıdi. Aqsaqaldyń armany qasıetti meken Mekke qalasyna sapar shegip, qajylyǵyn óteý bolatyn. Osy armanyna jetý úshin aqsaqaldyń basynan ótken qym-qýyt oqıǵalar týyndy jelisine balanady.
Soǵan oraı, týyndy kórermenin birde jylatyp, birde jigerlendiredi, ómir qıynshylyqtaryna moıymaı kúresýge úndeıdi. Kóńilge jiger syılaıdy. Qazaqtyń sanasyna sińip, boıynan kórinis tapqan asyl qundylyqtardyń biri ar men uıat sekildi uly uǵymdy qasterleýge, arzan abyroıǵa, qý dúnıege aldanbaı, ardy saqtaýǵa shaqyrady.
«Kempirdiń sıyrmen qımaı qoshtasqan tusy qatty áser etti. Kózge jas almaý múmkin bolmady. Bizder, qazaqtar qalaǵa kelip, maldyń qadirin umytyp bara jatyrmyz ǵoı. Bárimiz de aýyldan shyqtyq qoı. Sıyrdyń sútin iship, etin jep, kúsh-qýat alǵan adamnyń birimin. Túsirýshi toptyń jigitteri aýyl tirshiliginen habary bar eken. Álsiz tusymyzdy kózimizge kórsetip berdi. Bul adamdy tazalyqqa, ımandylyqqa úıretetin fılm eken», - dedi fılmniń tusaýkeser saltanatynda M.Áýezov atyndaǵy drama teatrynyń dırektory Esmuhan Obaev.
