Jańa Ferrari Luce elektrkóligi synǵa ushyrap, aktsııalardyń quldyraýyna sebep boldy
ASTANA. KAZINFORM — Ferrari kompanııasynyń jańa Luce elektrkóliginiń tanystyrylymy ınvestorlar men avtokólik áýesqoılary arasynda ekiushty reaktsııa týdyrdy. Premeradan keıin Ferrari aktsııalary Mılan men Nıý-Iork bırjalarynda kúrt tómendedi, dep habarlaıdy BBC.
Ferrari aktsııalary Mılan qor bırjasynda 8%-dan, al Nıý-Iorkte 5%-dan astamǵa tómendedi. Sarapshylar muny naryqtyń alǵashqy tolyq elektrli Ferrari kóligine saqtyqpen qaraýymen jáne lıýks sanatyndaǵy elektrkólikterge suranystyń jalpy tómendeýimen baılanystyrady.
Jańa Ferrari Luce brend tarıhyndaǵy alǵashqy bes oryndyq avtokólik boldy. Ol dızaıny men kýzov formaty jaǵynan klassıkalyq modelderden aıtarlyqtaı erekshelenedi.
Áleýmettik jelilerde Ferrari-diń jańa elektrkóligi qyzý pikirtalas týdyrdy. Bir qoldanýshylar jobany «sátsizdik» dep atasa, endi biri «avtodızaın shedevri» dep baǵalady.
Kópshilik Ferrari Luce-ti jappaı naryqqa arnalǵan elektrkólik modelderimen salystyrdy. Máselen, AIR Capital zertteý bóliminiń basshysy Per-Olıve Essıg jańalyqty «Honda Accord EV pen Tesla Model 3 qospasy» dep atap, avtokompanııanyń jańa strategııasyn túsinbeıtinin aıtty.
Bloomberg baǵalaýynsha, Luce modeli úshin Ferrari dástúrli túrde brendtiń bas dızaıneri Flavıo Mantsonı esimimen baılanystyrylatyn tanymal fırmalyq stılinen alshaqtaǵan.
Ferrari-diń alǵashqy elektrkóligin ázirleýge shamamen 5 jyl ýaqyt ketkeni aıtyldy. Ferrari Luce tanystyrylymy álemdik elektrkólik óndirýshileri qıyndyqtarǵa tap bolyp jatqan kezeńge tuspa-tus keldi. Ferrari-diń básekelesteri Lamborghini men Porsche suranystyń tómendeýi jáne qytaılyq brendtermen básekeniń kúsheıýine baılanysty tolyq elektrli modelderdi damytý josparlaryn qysqartqan.
Ferrari kompanııasy negizgi basymdyq áli de eksklıýzıvtilik pen shekteýli serııadaǵy kólikter shyǵarýǵa beriletinin atap ótti. Luce tanystyrylymynan keıin aktsııalar quldyraǵanyna qaramastan, Ferrari naryqtyq quny boıynsha Eýropadaǵy eń qymbat avtokólik óndirýshisi bolyp qala beredi.
Osyǵan deıin Ferrari óziniń alǵashqy elektromobılin tanystyrǵany týraly jazdyq.
