Jańa ereje: Jaıaý júrginshi jasyl túste kóliktiń manevrdi aıaqtaýyn kútedi
Jol qozǵalysy qaǵıdalary, kólik quraldaryn paıdalanýǵa ruqsat berý jónindegi negizgi erejelerge ózgeris engiziledi. Bul týraly Kazinform tilshisi QR Іshki ister mınıstrliginiń baspasóz qyzmetine silteme jasap habarlaıdy.
Jańa erejege sáıkes, baǵdarshamnyń jasyl túsi janǵan kezde jaıaý júrginshi jol qıylysynda qozǵalysyn bastap qoıǵan júrgizýshige manevrin aıaqtaý úshin jol berýi kerek. Ózgeris erejeniń «Jaıaý júrginshiniń mindetteri» dep atalatyn 3-taraýyna engizilmek.
«Jaıaý júrginshiler júris rettelip turatyn jerlerde – retteýshiniń sıgnalyn nemese jaıaý júrginshiler baǵdarshamyn, al ol bolmaǵanda, kólik baǵdarshamyn basshylyqqa alady. Sondaı-aq baǵdarshamnyń nemese retteýshiniń ruqsat berý sıgnaly qosylǵan kezde jaıaý júrginshi jol qıylysy arqyly buryn bastaǵan qozǵalysty aıaqtaý úshin kólik quraldaryna jol beredi. Bul norma retteletin jaıaý júrginshiler ótkelderinen ótetin jaıaý júrginshilerge qoıylatyn talaptardy kúsheıtýge múmkindik beredi. Sebebi qazirgi ýaqytta jaıaý júrginshiler kóbinese óz qaýipsizdiginiń aspektilerin elemeıdi jáne kólik quraldarynyń buryn bastaǵan manevrin aıaqtaǵanyna kóz jetkizbesten baǵdarsham sıgnaly boıynsha jolǵa shyǵady», - dep jazylǵan ishki ister mınıstri buıryǵynyń jobasynda.
Aıta ketsek, QR Іshki ister mınıstriniń «Jol júrisi qaǵıdalaryn, Kólik quraldaryn paıdalanýǵa ruqsat berý jónindegi negizgi erejelerdi, kóligi arnaıy jaryq jáne dybys sıgnaldarymen jabdyqtalýǵa jáne arnaıy tústi-grafıkalyq shemalar boıynsha boıalýǵa tıis jedel jáne arnaıy qyzmetter tizbesin bekitý týraly» Qazaqstan Respýblıkasy Іshki ister mınıstriniń 2023 jylǵy 30 maýsymdaǵy №534 buıryǵyna ózgerister men tolyqtyrýlar engizý týraly» buıryq jobasy Ashyq NQA alańyna ornalastyrylǵan.
