Jańa ereje: mýzeıler men kitaphanalar «ulttyq» mártebesin qalaı alady
ASTANA. KAZINFORM – Qazaqstan Prezıdentiniń Jarlyǵymen memlekettik mádenıet uıymdary men kásibı kórkemóner ujymdaryna «Ulttyq» mártebesin berý qaǵıdalaryna ózgerister engizildi. Jańartylǵan talaptar mýzeıler men kitaphanalarǵa qatysty.
Jarlyq 2026 jylǵy 10 naýryzda kúshine enedi.
Jańa qaǵıdalarǵa sáıkes mýzeıler:
- keminde 25 jyl turaqty ári tıimdi jumys isteýi tıis (astanadaǵy respýblıkalyq menshiktegi murajaılar úshin — keminde 10 jyl);
- kásibı deńgeı men qyzmet sapasyn arttyrý maqsatynda ınnovatsııalar engizýi qajet;
- jeke ǵımaraty bolýy tıis;
- halyqaralyq jobalarǵa qatysýy kerek;
- qorda ulttyq mádenı muraǵa jatatyn mádenı qundylyqtardyń úlesi keminde 10% bolýy qajet.
Kitaphanalarǵa qoıylatyn talaptar:
- keminde 25 jyl turaqty jumys isteý;
- qyzmet sapasy men tıimdiligin arttyrý úshin ınnovatsııalar engizý;
- jeke ǵımaratynyń bolýy;
- halyqaralyq jobalarǵa qatysý;
- sırek qoljazbalar, kóne kitaptar men qujattar qorynyń bolýy jáne olardyń keminde 10 paıyzy ulttyq mádenı muraǵa jatýy tıis.
Aıta keteıik, buǵan deıin Ulttyq ortalyq mýzeıde sırek kınojádigerler kórmesi ashylǵanyn jazǵan edik.
Arýjan Jánádil