Jańa ereje: kóppáterli turǵyn úılerdiń turǵyndary neni bilýi kerek

ASTANA. KAZINFORM — Qazaqstanda turǵyn úı qatynastary týraly zańǵa mańyzdy ózgerister kúshine endi, dep habarlaıdy Astana qalasy ákimdiginiń resmı saıty.

Jańa talaptar kóppáterli turǵyn úılerdi basqarý salasynda tártip ornatýǵa, sondaı-aq MIB, PIK jáne basqarýshy kompanııalardyń ashyqtyǵy men jaýapkershiligin kúsheıtýge baǵyttalǵan.

Basqarýshy uıymdar endi árbir úı boıynsha, onyń ishinde qazirgi jáne jınaq shottaryn qosa alǵanda, bólek esep júrgizýge mindetti. Tarıf belgileý kezinde menshik ıeleri jınalysynda jyldyq shyǵyndar smetasyn bekitý mindeti engizildi.

- Ár úı boıynsha shyǵyndar men málimetter turǵyn úı-kommýnaldyq sharýashylyǵynyń biryńǵaı aqparattyq júıesine engiziledi, - delingen habarlamada.

Tehnıkalyq paıdalaný máselesine erekshe nazar aýdarylǵan: árbir nysannyń jyl saıynǵy tekserý aktileri, túgendeý tizimi jáne ortaq múlikke qatysty tolyq qujattamasy bolýy tıis.

Jańa normalar sońǵy jyldardaǵy negizgi máseleni – MIB tóraǵasy nemese basqarýshy kompanııa aýysqan kezde qujattarǵa qoljetimdiliktiń joǵalýyn toqtatady. Endi berý tártibi naqty retteletin bolady.

Osynyń barlyǵy tarıfterdiń artyq belgilený qaýpin tómendetip, qarajat jumsaýdyń ashyqtyǵyn qamtamasyz etýi jáne basqarýshy qurylymdardyń jaýapkershiligin arttyrýy tıis.

Aıta keteıik, Elimizde turǵyn úı kómegin esepteýdiń jańa tártibi ázirlendi.