Jańa ereje: kıik múıizin satý protsesi qalaı júrip jatyr
ASTANA. KAZINFORM — «Jasyl damý» AQ kıik múıizderin ótkizýdi uıymdastyryp jatyr. Bul týraly Ekologııa jáne tabıǵı resýrstar mınıstrliginiń Orman sharýashylyǵy jáne janýarlar dúnıesi komıteti málim etti.
— 2025 jylǵy jeltoqsanda Samarqandta ótken Joıylyp ketý qaýpi tóngen ań men ósimdikterdiń halyqaralyq saýdasy týraly konventsııasy (CITES) Taraptar konferentsııasynyń (COP20) 20-shy otyrysynda qabyldanǵan sheshimge sáıkes, Qazaqstanǵa kıik múıiziniń halyqaralyq saýdasyna jalpy kólemi 30 tonna kóleminde ruqsat berildi. Osyǵan baılanysty 30 tonna kıik múıizin ótkizý josparlanyp otyr. Qazirgi ýaqytta «Jasyl damý» AQ kıik múıizderin ótkizýdi uıymdastyrý boıynsha tıisti jumystardy iske asyryp jatyr. Osy datadaǵy jaǵdaı boıynsha kıik múıizderin ótkizý júzege asyrylmady, — delingen Orman sharýashylyǵy jáne janýarlar dúnıesi komıtetiniń Kazinform agenttigine bergen jaýabynda.
Eske salsaq, byltyr jeltoqsan aıynda Qazaqstan kıik múıizin eksporttaıtyny málim boldy.
Al bıyl naýryz aıynda Ekologııa jáne tabıǵı resýrstar mınıstri odan túsken qarajat qaı maqsatta jumsalatynyn aıtty. Aqsha bıoalýantúrlilikti saqtaýǵa, kıikterdi qorǵaýǵa, sharýashylyqtardy materıaldyq-tehnıkalyq qamtamasyz etýge jumsalady.
Samarqandta ótken Konventsııa (CITES) otyrysynyń sheshimine sáıkes, jylyna 10 tonnaǵa deıin ótkizýge bolady.
Osy jyly tamyz aıynda Almatyda 1,2 mlrd teńgege baǵalanǵan kıik múıizi satylymǵa shyǵarylǵanyn jazǵan edik.
Satýshy tarap — «Jasyl damý» AQ, al balans ustaýshy — QR Ekologııa jáne tabıǵı resýrstar mınıstrligi Orman sharýashylyǵy jáne janýarlar dúnıesi komıtetiniń «Ohotzooprom» óndiristik birlestigi» RMQK.
Aıta keteıik, kıik múıizi 4 tamyzdan bastap jańa erejeler boıynsha satylady.
