Jańa ereje boıynsha 70 myń qazaqstandyq jalǵa berilgen baspanany jekeshelendire alady
ASTANA. KAZINFORM — Qazir halyqtyń áleýmettik turǵyda osal sanatyndaǵy 600 myńǵa jýyq adam baspana alý esebinde tur. Bul týraly QR ÓQM Qurylys jáne turǵyn úı-kommýnaldyq sharýashylyq isteri komıtetiniń tóraǵasy Baqytjan Júnisbekov málim etti.
— 2025 jyly jańa zańnamalyq túzetýler aıasynda turǵyn úıge muqtaj adamdardy tirkeý jáne jalǵa beriletin turǵyn úıdi bólý fýnktsııasy ákimdikterden ulttyq damý ınstıtýtyna aınalǵan «Otbasy banki» AQ-ǵa berildi. Qazirgi ýaqytta 951 000 adam esepte tur, onyń ishinde shamamen 600 myńy halyqtyń áleýmettik turǵyda osal tobynda, — dedi Baqytjan Júnisbekov Ortalyq kommýnıkatsııalar qyzmetindegi baspasóz máslıhatynda.
Sonymen qatar ol zańǵa engizilgen túzetýler aıasynda buryn «satyp alý quqyǵynsyz» jalǵa berilgen turǵyn úıdi jekeshelendirý quqyǵy qarastyrylǵanyn eske saldy.
— Bul quqyqty memlekettik baǵdarlamalar arqyly turǵyn úı alǵan shamamen 70 000 adam paıdalana alady. 2025 jyly 15 myńnan astam azamat jekeshelendirý quqyǵyn paıdalandy, olardyń shamamen 9 myńy turǵyn úıdi tegin aldy, — dedi komıtet basshysy.
Munymen qosa ol memlekettik qoldaýdyń qosymsha sharasy retinde turǵyn úıdi jalǵa alý aqysynyń bir bóligin sýbsıdııalaý men turǵyn úı sertıfıkattaryn berý qarastyrylǵanyn aıtty. 11 myńnan astam adam osy sýbsıdııalardy paıdalandy, bul maqsattarǵa respýblıkalyq bıýdjetten 7,6 mlrd teńge bólindi.
Budan buryn habarlanǵandaı, zeınetaqy jınaǵy esebinen turǵyn úı alýdyń tártibi ózgerdi.